ISIS shidi ajanga PM Modi aser Parrikar tepsettsü amokmeren

Panaji (Goa), January 19 (Agencies): ISIS kiralongrar teloki sign süa aliba shidi ka ajanga Ato kilonser Narendra Modi aser Union Defence Minister Manohar Parrikar na tepsettsü amokmerenogo.
Goa Police-i iba shidiji state nung aliba police station ajak dangi yokogo aser iba ken o bushisüngdangtsü atema Anti Terrorist Squad (ATS) nem bendanga agütsüogo.
Iba shidiji taoba hopta State Secretariat dangi aruba sülen Goa Police-i tapet mera agi tenzük, ta tanü police ketdangser kati ashi.
“State police indang agency ajaki iba shidiji bushisüngdangdagi. Kobi melii iba shidiji kong nungi’ar jangjatsü,” ta ketdangserisa ashi.
“Shidi tatembanglenji ISIS ta zülua lir,” ta ketdangsertemi ashi.
Iba shidi nungjisa India linük nung nashi tepsettsü nokdangba atema tejashiba-a zülusema lir.
2015 küm nashi shi achiba atema nisung aika tepsetba aser Muslim nunger dak azükba osang aika liasü. October 2015 nunga Jammu & Kashmir nung Muslim nunger MLA kati nashi shi party ayongzüka akaba atema BJP MLA temi pa dak azük.

You must be logged in to post a comment Login