ISIS teloki inyakba

Sri Lanka nung ISIS ta asüba teloki tawa Yisu shia aruba anogo bilemtetba Easter Sunday  sentong nung tamangertem adenshia alidak tenla kitem aser ano bendanglen nungi arua raliwalirtem anendak hotel tajungtem nung, pei mang agi bomb kümer oa pokloktsüba lendong nung nisung noklang ana asem tashi pokseta südaktsüba aser nisung noklang pongo shi yiruba osang asenoki angashiogo. Ajisüaka, asenoki ISIS ta asüba telok tenüng ya mangashidangi alitsüa akok mesüra angashiyonga mejangjai alitsüa akok, ajisüaka asenok shinga iba ama teloki inyakba taochi makaba lendong mapatem nungi jenbua mali. ISIS ta asüba ya oren tatsüba nung amshir dang ashi, talangba nung aser tabensaba nungbo ‘Islamic State in Iraq and Syria’ ta asüba lir. Iba telok ya Muslim nungersa asüyonga Sharia temzüng ozüng akanga ametertem lir aser parnok nükjidongji Sharia Muslim temzüng ozüng kübok Iraq aser Syria nungi tenzüker tanga limatem nung dena parnoki yimsü asütsü. Tamasabo, Iraq nung Osama bin Laden-i anir tenzükba al Qaeda kiralongrar telok nung ISIS tenzükertem ya liasü. Parnok rongnung talisa tanishir ka tenüng agi Abu Musab al Zarqari-i anir tenzük. Iba mapang nung jagi tenzüka parnoki Iraq nung dang masü saka Syria nung dena tongpang jazüka rara aser Iraq nung dang masü saka Syria dena parnok yimten kübok alitsü asoshi kanga sashia raratsü tenzük. Joko, 2014 küm tashi nungbo Iraq nunga  America nunger sepaitem liaka  Falluja, Mosul aser Tikrit yimtitembo makteter parnok yimten yimsüsüba küboki aidaktsü. Iba amaji Syria nunga tawa tashi to Baghuz yimtibo parnok ket nung liasü. Ajisüaka, tangbo ISIS telok ya Iraq aser Syria ajak nungi atsüngdokogo. Atangji, tangbo ISIS yimten kübok yimsüsüba lima aser yimti kata mali saka parnokji alima ajak nung prokshia lir. Parnoki parnok telok nung lenirtemi sayuba tamangba yimsü aser yimten tsütsü tangatetba nungi mepilar. Iba jagiang, parnok tanishirtemi sayuba nung pei taküm samatsüa mapayui tenla agütsür. ISIS teloki amangba Muslim yimsüibo tangar yimsü amangertem tepsettsü ajungshir, kechiyong Muslim yimsü anemertemji parnok tsükchir aser parnok tsükchir tepsetba jagi kotakleni anir. Anungji, ashiko, kotaki aotsü atema ISIS teloki sayuba nung tashi angaa nokdakertemi parnok kechi nung lidir yangji inyaktettsü. ISIS teloki inyakba mapatem ajak rongnung tesüngmangtsü aser tetsübutsü mapaji pei taküm agi bomb kümer oagi peisasa pokseta asüba agi tangar yimsü amangertembo aika südaktsütsüsa temulung koka mesüzüktetbaji asütsü. Atangji, Sri Lanka nung ISIS telok tenteta aliba osang mangazük aser parnok telok nükjidongjia Sri Lanka amaktsüba masü saka yangji aliba Khristan-tem taküm samatsütsü asoshi liasü. Sri Lanka nung bomb lendong agütsüba kuli ya ana jembir; kaji March 15 nü New Zealand nung Christchurch ta ajaba tesem nung Muslim nunger tenla ki ana tashi nung külema alidang nisung kari injang amshia nisung 50 tashi khasetba asoshi mangyangba mapa ka liasü ta jembir aser ano kaji, Syria nung ISIS teloki agia aliba Baghuz yimti dang anünga aliba, iba yimtijia atsüngteta adokba agi tejashi marem iba mangyangji Sri Lanka nung Easter anepdang lendongji agütsüogo ta jembir. Koba kuli südir süang, ochi o kaji ISIS telok yagi Khristantem arishir. Ibayongji, Sri Lanka nung dang masü saka kasa lendongji Khristan-tem longsua alidak Nagaland ama nunga agütsütsü bilema alitsüa akok. Itemji lazüka center government-ia itdangiter mapa kanga junga inyaka alitsü imlar. Iba denji ano NSCN-IM telokia ISIS telok ket nungi kümzüka alitsü asoshi osang ka sangoktsüogo. Ajisüaka, asenoki metettsüba kaji asenokibo asen taküm tenlatsübo tebilema mebilemer aser tsübur saka ISIS telok nung adenertemibo pei taküm tenla agütsütsü kecha tsübua aser sasaa mali, pelashishia dang pei mang agi bomb kümer tangar aika den külemi pokseta asütsübaji jangratema bilemer . Item kiralongrartem anema mita alitsübaji senso ajak mapa asütsüla.