ISIS temi merenshiba sülen Syria Muslim nungertemi Yisu angu

Damascus, Tsüklai/Feb. 05 (Agencies): Syria nung ISIS ama Islam yimsü akhanga amshirtemi Allah tenüng nung timtem balala agütsüba sülen Khristan yimsü dangi meyipba indang lemsatep.
Kobani nung tang tasen tenzüka aliba Church of the Brethren nung züngsemtem ya Sharia ozüng kübok lir Khristan yimsü ajanga parnok ajungmesoa liasü, aser iba indang kuli ya NBC News den lemsatep.
Arishi küm 23 tain Farhad Jasim, shiba mechanic ka ama inyaka liasü, pa ya taoba küm Khrista agizüka liasü. Pai Islam nunger yimya memetet ta ajiteta ISIS temi 2016 küm tetenzüklen ita trok tepuokdak ayu. Pa tepuokdak aliba mapang timtem reshikangshi jenti ajuru aser tashiyim agi Quran züngdaktsü.
“Parnoki reshikangshia amshiba kü nük agi ngur ni kü tamangba yimsü indang shisadang,” ta Jasim-i ashi.
September nung amenokba Church of the Brethren indang angashia pai iba tesem semdangtsü mulungtet. Church of the Brethren ya 18 century mapang Germany nung tenzükba denomination indang kongdang ka lir.
“Mapang talangka melie Khristan yimsü ya ni bushiba yimsü ka lir ta ngutet,” ta pai ashi.
Pai yimsü tasen agizükba ajanga par kinungertemi pa sendok ta Jasim-i ashi aser künü anogo par kinungeri pa dang tai atokba kisüng masü saka Khristan yimsü agizüktsü imlar, ta shisem.
“Islam tenüng nung ISIS tem ya alir süra ni Muslim nunger ka ama meliner. Parnok Tsüngrem ya kü Tsüngrem masü,” ta pai ashi.
Aarishi küm 47 tain aluyimer Firas-ia pa ya ISIS kübok küm ana lir Khristan yimsü agizük, ta NBC dang ashi. ISIS temi aginüba ama Islam yimsü mamshirtem parnoki merenshia amshiba indang pai bilemteta jembi.
“Teburtem aser lanurtem moko chia anguba sülen yimdong nung süng aser lisü agi azükba ni nguogo. Nisung karbo tebur den shi nung medemba ajanga ki talang nungi tsükdangtsüba nisung tasümangtem ne nguogo. Ibaji parnok indang Islam lir,” ta Firas-i ashi.
“Kodak ya ISIS pur aser parnoki amangba atema yangluba asünungbo, ni Kodak nung süaka parnok den alitsü dang nungibo mulumi nung alitsü ang shimtettsü,” ta pai ashi.
Syria-Turkey arrtsülen nungi ISIS tem ya küm pezü tejakdang atsüngdok, saka Muslim nunger timba aliba tesem nung Khristan yimsü dangi meyiptsü ya mishi ka amai aser lendong tulu lir.
Khristanpur reshikangshiba mita reprangba telok, Open Doors ajanga ashiba agi, Syria nung item telungpurtem maliba tesem nung süaka Islam nungi meyipba Khristanpur ya timtem balala ajurur aser mezüngmeshia amshir. Kobani tesem nung Khristanpur 300 shi alir, ta asadangteta lir.
Arishi küm 38 tain Omar, shiba arogo nung ketdangser ka ama inyaker, pai ashiba agi, ISIS temi iba tesem magiteti aliba mapang nunga Islam nungi Khristan yimsü dangi meyiptsü ya akhang akhanga nokdanga liasü. “ISIS kübok Khristan yimsü dangi meyiptsü ya bilemtsüa tamakoktsü. ISIS temi na idangjisa tepseta indoktsü,” ta pai ashi.
“Yangi aliba adianutem Khrista dangi arur ya timba ISIS temi parnok aser parnok kibongtem reshikangshia amshiba ajanga aruba lir,” ta Omar-i ashi.
“Onoki shinga danga tamangba yimsü nmelentsü mashi. Sarasadem, temeim tanüla, kati ka den jungtepba aser tatok agütsütetba ya onok indang hadir lir,” ta pai ashi.
Tang Syria nung nütsüng shilem 4.6 dang Khristanpur lir, ta Aid to the Church in Need ajanga ashir. Maneni 2011 küm civil war tenzükba sülen Khristanpur 700,000 shi Syria toktsür ogo, ta amanger.
December nung US Tir Donald Trump-i US sepaitem Syria nungi anir arutsü ta sangdonga liasü.
“Asenoki ISIS madak takok nguogo. Asenoki parnok madak kanga junga takok ngutetogo. Asenoki parnok ket nungi ali tanaben agitetogo aser tang joko asen sepaitem kidangi meyipa shilangtsü mapang lir,” ta pai shia liasü.
Saka US sepaitem Syria nungi agienba ajanga timtem ajurur aliba Khristan, Kurds aser ethnic kin tilatem lendongbang nung yutsür, ta aikati shisabulua bilemtsür. Maneni Trump-isa Syria nung ISIS aser tanga kiralongrar teloktem tashi itshia kümra US sepaitem tanaben yoktsü, ta metetdaktsü.
“Asenoki Khristanpur busemer, asenoki Kurds tem yarir ta Tiri jangja jangja shiogo,” ta White House Press Secretary Sarah Sanders-i tawa CBN News dang ashi.
“Pai Turkey danga jangja jangja metetdaktsüogo, pai lokti balala nunga yimjak nung metetdaktsüogo, aser Tiri Iran madaka akhang akhanga nokdakba ya yangji aliba nüburtem amokmeren mesüdaktsütsü mechi lir,” ta Sanders-isa shia liasü.