New Delhi, May 21 (Agencies): Kiralongrar telok, Islamic State video ka ajanga, India nung Muslim nunger tepsetba atema parnok mang ayangtsü, ta amokmerenba mapang Honibarnü Centre-i, linük kümzüka alitsü atema lenla ajaklen nungi meranga inyakdar, ta metetdaktsü.
ISIS video nungji, Kashmir nung Muslim nunger tepsetba, Babri mosque raksatsüba aser Gujarat o Muzaffarnagar na nung Muslim nunger anema raraba indang jembia lir.
Iba dak sentakba nung Minister of State for Home, Kiren Rijiju-i, “Item ama video ji ajanga India nunger majungshitsü. Item ama olulu video aika sayur. ISIS mesüra shirnoki item ama proker, ibaji ajanga India nunger ajungmesotsü makok. Item amaji linük nung ataloktsü atema tera meyangdaktsütsü ta India nungeri lemtetogo,” ta ashi.
Ano Union Home Minister, Rajnath Singh-ia, “India kümzüka alitsü atema nüngdakba maparen inyakdar. Kin kidong, tamangba yimsü balala nüburtemi tashi ajak agi kiralongrarten anema raratsü,” ta ashi.
ISIS-i sayaba video tasen ka nung, India nunger kiralongrartem parnok den denogo aser Iraq o Syria na nung raradar, ta ashi. Arabic oshi nung minute 22 indang documentary ji IS-i India aser South Asia na nung ranglongker yangluba mezüng video lir.
Iba video nung nisung pongu rongnung Thane (Mumbai) nungi engineering kaketshir, Fahad Tanvir Sheikh densema lir. Pai tiyazü tenüng Abu Amr’ al-Hindi amshir aser video nungji pai, IS kiralongrartem India-i arua Kashmir, Gujarat aser Muzaffarnagar nung Muslim nunger tepsetba atema mang ayangtsü, ta amokmerena lir.
Kasa video nung taoba mapang Indian Mujahideen telungpur den dena aliba südi ta temulung malemba züngsem kati, “Onok mapa jangjaner India nunger dang ni ya ashir- Islam yimsü agizükang, jizya (saru) agüjang mesüra asütsü renema liang,” ta shia lir.
You must be logged in to post a comment Login