ISIS ya Muslim nunger atema RSS lir: JD(U)

Delhi, Nov. 02 (Agencies): Hombar nü Janata Dal (U)-i International kiralongrar telok ISIS ya Muslim nunger indang Rashtriya Swayamsevak Sangh (RSS) lir, ta ashi.

“ISIS aser RSS ya tetoktepertem lir. Atangji, ISIS ya Muslim nunger indang RSS lir,” ta JD (U) lenir, KC Tyagi-i ashi.

Linük nung kaketzülurtem aser artist temi, BJP-i par züngsemtem mazüokteter ta aitsüba aser puti puin otsü nung mongin, Irfan Habib-i RSS ya ISIS den medemdanga jembiba sülen anogo ka lir tanü JD(U)-i item o jembiogo.

Deobar nü lungkak aiter kaketzülurtem senden ka amenba mapang, linük nung tesempatep aser taremzüktep maliba tensa anema lungkak aitba ya Congress aser Left party temi ajungshiba lir ta tai tongloktsübaji ashishitsü ta bangjema liasü.

Tanü iba senden nung Habib-i, “tangatetba reprangdangra Islamic State aser RSS na tsüngda tepila mali,” ta jembia liasü.

Tang linük nung mepetmesü tensa anema kaket keno zülurtem, sangro zülurtem, film yanglurtem aser artist balalai lungkak aitba nung scientist tema denogo.

Romila Thapar, Irfan Habib, KN Pannikar aser Mridula Mukherjee nunger densema puti puin mongin 53-i, Ato kilonser, Narendra Modi-i linük nung mepetmesü aser tetsübu aliba atema sangdong tajung ka magütsür, ta aitsüogo.

Taoba hopta ishika tsüngda Sahitya Akademi award angur tajemba agi nisung 33-i, BJP-i aniba NDA yimsüsüba kübok linük nung mepetmesü tensa lir ta shia lungkak aitba temaitsü pei award meyipa agütsüogo.