ISL 2016: Kolkata teloki semifinal 1 buba shilem asaya akok

Kolkata kübok Rabindra Sarobar Stadium nung Mumbai City FC telok madak goal 3-2 agi 2016 Hero Indian Super League football asayamong semifinal 1 buba shilem asaya akokba sülen Atletico de Kolkata asayartem pelatepba noksa nung angur. (Kolkata, December 10)

Kolkota, December 10 (Agencies): Atletico de Kolkota teloki goal 3-2 agi Mumbai City FC telok madak takok ngua, Hero Indian Super League (ISL) 2016 asayamong semifinal 1 buba shilem asaya tanü, Honibar nü asayaogo.
Tanü asaya tenzüker minute 3 buba nung Lalrindika Ralte-i külem asayar, Borja Fernandez-i renemtsüba cross ball agizüka, pa tekolok agi 1 buba goal agüja, par Kolkata telok temaba jenjang nung ajungkettsü.
Mumbai asayar, Leo Costa-ia külem asayar, Sunil Chhetri-i pa tekolak agi tongtsüba ball agizüka, minute 10 buba nung goal-ji meyipja, par telok anaprongla kasa jenjang kümdaktsü.
Iba sülen, külem asayar, Gerson Vieira-i pa tekolak agi minute 19 buba nung ball tongokja goal agütsüba ajanga par Mumbai telok goal 2-1 agi temaba jenjang angu.
Ajisüaka, ISL otsü nung goal timtiba agütsüsang, Iain Hume-i minute 39 buba nung 2 buba goal-ji meyipja, par Kolkata o Mumbai na nem maneni kasa jenjang ngudaktsü.
Hume-isa agütsüsemba asaya mapang nung 3 buba goal agüja, par Kolkata telok temaba jenjang nung ajungkettsü.
Tanüngba asaya mapang nung Mumbai teloki goal memeyiptsütsüba yong Kolkata teloki tanü asayaji kokadok.
Ano külen, tanü asaya nung yellow card temerenshi tanabuba agizüka, Mumbai telok’er tongti asayar, Diego Forlan-i asayadak nungi temai tuguadoktsüsa jenjang ajuruba yong, par Mumbai teloki Kolkata telok den tan December ita 13 nü asayatsü lemzükba semifinal 2 buba shilem asaya nung bilemba ama toktepa shilem magitettsüsüa jenjang bener arutsüogo.
Kerala Blasters telok aser Delhi Dynamos telok natia tan asayamong 2 buba semifinal indang 1 buba shilem asaya tan Deobar aonung 7:00 ako nungi tenzüka, Kerala kübok Kochi yimti nung asayatsü renema lir.