ISL 3: FC Goa-i Lucio par tongti asayar kümdaktsür

Panaji, September 02 (Agencies): 3 buba Hero Indian Super League (ISL) football asayamong nung par tongti asayar ama maneni shilem agidaktsütsü nükjidong nung FC Goa teloki Brazil nunger Lucimar Ferreira da Silva par telok nung anioksemshiogo.
2002 World Cup asayamong takok marok agizükba Brazil telok nung central defender, Lucio ta ajasang-i Italy nung tentetba Internazionale telok nung züngsemdang Seria A, UEFA Champions League aser Coppa Italia takok marok agizükba osang jangjaogo.
Lucio-i Bayer Leverkusen aser Bayern Munich telok tenüng nunga takok ngua asayba osang bushiteta lir.
Pai par Brazil national team tenüng nung defender ama asaya 105 tashi nung shilem agiba aser iba mapang pai goal 4 tashi agütsüba osanga jangjaogo.
Lucio-i 2015 küm nungi tenzüka Goa telok nüng tongti asayar ama shilem agi aser pai aniba Goa teloki 2015 ISL asayamong final asayatsü jenjang ajangzüka liasü.
“Ni Goa telok tenüng nung maneni asayatsü maongka anguba atema kanga pelar. Ozü teloki yaküm final asayatsü jenjang ngua liasü aser takümbo takok marok agizüktsü merangtsü,” ta arishi küm 38 tain Lucio-i metetdaktsü.