ISL Champions Chennaiyin FC puri asayar ti toktsü

Chennai, Aami (June) 2 (Agencies): Indian Super League (ISL) champions Chennaiyin FC puri taoba season cup akokba team nungi asayar ti tashi toktsütsü telemtetba agiogo.
Asayar ti rongnung asayar tejen Dhanachandra Singh densema lir. Pa club den tezüngzüktepba Yangtepnü temogo, ta CFC sangdong ka ajanga metetdaktsü.
Tezüngzüktepba tembangertemrongnung Bikramjit Singh, Keenan Almeida, Jude Nworuh, Fulganco Cardozo, Sanjay Balmuchu, Pawan Kumar aser Shahin Lal Meloli nunger densema lir.
CFC puri taruba season atema asayar 13 maneni shimogo aser coach John Gregory o sports scientist Niall Clark nata ano küm kaka tezüngzüktepba yanglushiogo.
Dhanachandra Singh-i ISL mezüngbuba season ana nung Chennaiyin FC pur atema asaya 28 nungi 26 nung asayaogo. Ajisüaka 2016 season pa temokok yiruba ajanga masayatet aser taoba season nung Chennaiyin puri ISL trophy tanabenbuba akokdang pa asaya asem nung dang shilem agi.
Maneni team-i Bikramjit toktsüogo, shibai taoba season midfield nung shilem tulu agiogo.
CFC puri ano Nigerian attacker Jude Nworuh dena toktsüogo, shiba team tenüng nung 11 ben asayaa liasü.
Taküm ISL akoker 2019 AFC Cup nung asayatsü asoshi maongka angutsü.