ISL: Chennaiyin FC-i goal 3-0 agi Mumbai City FC akok

Chennai, December 01 (Agencies): Chennaiyin FC teloki goal 3-0 agi Mumbai City FC telok madak takok ngua tang tasayadak Indian Super League (ISL) asayamong semifinal nung shilem agitsü jenjang angutsüsa jenjang tajung tanü Mongolbar nü nguogo.
Colombia nunger Stiven Mendoza-i tanü asaya tenzüker minute 9 buba nung par Chennaiyin telok asoshi mezüngbuba goal agüja tan asayamong nung ajak agi goal 11 buba agütsür asayar aküm.
Külem asayar, Jeje Lalpekhlua-ia minute 17 buba nung goal 1 agüja par Chennaiyin telok goal 2-0 agi temaba jenjang nung ajungkettsü.
Asaya mezüngbuba shilem tembangtsü mapang nung Thoi Singh-i yanglutsüba pass tajung ka agizüka Bernard Mendy-i par telok asoshi tasembuba goal agüja par Chennaiyin telok nem takokba bener arutsü.
Mumbai asayartemia tanü kanga meranga asaya saka parnoki goal 1 danga magütsüteti tanü tamakok ajurua liasü.
Tan takok anguba sülen Chennaiyin teloki asaya 13 nung ajak agi points 19 ngua tan asayamong nung temaba jenjang nung alir telok tarensen nung 4 buba jenjang nguogo.
Ano külen, Mumbai teloki tanü tamakok anguba ajanga par teloki asaya 13 nung ajak agi points 13 ngua asayar telok tarensen nung 7 buba jenjang nung alitsüsa jenjang angur lir.