ISL: Delhi o Goa na temaba jenjang atema tanü asayatsü

New Delhi, December 05 (Agencies): Delhi Dynamos aser FC Goa telok nati par tatembangba round asüng, Deobar nü Delhi yimtiba nung asayaba sülen telok ana rong nung kati tang tasayadak Indian Super League (ISL) football asayamong nung temaba jenjang abener telok akümtsü.
Goa o Delhi napronglai tang points 22 ngua tan asayamong nung temaba jenjang nung alir telok tarensen nung tanabuba aser tasembuba jenjang ngua lir saka Goa teloki tan asayamong nung goal timba agüja par telok jenjang tajungba lir.
Telok anapronglai semifinal asayatsü jenjang ajangzüka lir saka par telok anapronglai tan asayamong nung temaba jenjang abentsü alizüng ayuba osang jangjaogo.
Goa madak takok angutsü nükjidong nung Delhi asayar & manager, Roberto Carlos-i par tongti asayar 2 – Robin Singh o Seminlen Doungel na Kerala Blasters den asayaba asaya nung shilem magidaktsüi anisüngzükdaktsüogo.
“Asüng asaya nung ozü asayar tajungtem shilem agidaktsütsü renema lir. Ozü teloki asüng takok ngua temaba jenjang angutsü merangtsü,” ta Goa Assistant Coach, Fernando Vannucci-ia tanü metetdaktsü.
Ajisüaka, temerenshi ngua aliba yong Goa midfielder, Brazil nunger Leo Moura-i asüng asaya nung shilem magitettsüsa jenjang tamajung ngua lir.
Goa den asayaba mezüngbuba asaya nung Delhi-i goal 0-2 ngua tamakok ajuru saka par telok jenjang tajungba küma tang temaba jenjang nung alir telok tarensen nung densemogo.
Ano külen, Chennaiyin FC teloki goal 1-0 agi FC Pune City madak takok ngua semifinal asayatsü jenjang tanü nguogo.
Tanü asaya tenzüker minute 64 buba nung Jeje Lalpekhlua-i par Chennaiyin telok asoshi takokba goal-ji agüja liasü.
Par teloki tanü takok anguba sülen ajak agi points 22 ngua tang Goa aser Delhi na den külemi asayar telok tarensen nung 2 buba jenjang tongogo.