ISL: Delhi teloki Chennaiyin FC akok

New Delhi, November 09 (Agencies): Tongti asayar, Florent Malouda-i goal 2 agütsüba densema, par Delhi Dynamos teloki goal 4-1 agi Chennaiyin FC madak takok ngua, tang tasayadak Indian Super League (ISL) asayamong nung tanü, Bodbar nü shilem agiogo.
Tan takok anguba sülen Delhi teloki asaya 9 nung ajak agi points 16 ajangzüka, tan asayamong nung shilem agir telok tarensen nung temaba jenjang angur telok kümogo.
Defending champions, Chennaiyin telokia asaya 8 nung ajak agi points 10 ngua, asayar telok tarensen nung 5 buba jenjang ajangzükogo.
Tanü asaya tenzüker minute 15 buba nung striker, Richard Gadze-i goal 1 agüja, par Delhi telok temaba jenjang nung ajungkettsüba sülen Malouda-i minute 25 buba nung goal 1 agüja, par Delhi telok goal 2-0 agi Chennaiyin telok den temaba jenjang kümdaktsü.
Tan goal agütsübaji France nunger Malouda-i tan ISL asayamong nung mezüngbuba goal agütsür lir.
Defender, Bernard Mendy-ia minute 37 buba nung goal 1 agüja, par Chennaiyin telok jenjang tajungba kümdaktsü.
Ajisüaka, Kean Lewis-i 3 buba aser Malouda-i 4 buba aser takokba goal agüja, par Delhi telok nem takok ngudaktsü.