ISL Draft: Eugenson, Anas na ajaki alitsü merangtsü

Mumbai, July 22 (Agencies): Deobarnü Indian Super League Players Draft nung India nunger asayar 200 shi draft asütsüba lir aser item rongnung India nunger international midfielder Eugeneson Lyngdoh aser defender Anas Edathodika na ajaki alitsü asoshi merangtsü.
Taküm tasen züngsemba Jamshedpur FC aser Bengaluru FC na dena ISL nung tanga club tem ajak ISL season pezübuba atema asayar tajungtiba alitsü asoshi merangtsü. Iba asayamong November ita tenzüktsü aser ita pongu tashi asayatsü.
Temaba jenjang nung asayar Sunil Chhetri, Udanta Singh, Jeje Lalpekhlua, C K Vineeth aser Sandesh Jhingan nungerbo asayar draft asüba nung madentsü, kechiyong parnok pei club-i mechioki yua lir.
Chhetri aser Udanta na Bengaluru FC pur-i yua lir aser Chennaiyin FC pur-i iba season nung Jeje maneni parnok club nungi asayadaktsütsü asoshi telemtetba agiogo.
India nunger defender Jhingan aser national team-mate forward Vineeth na-prongla maneni 2016 tanabuba jenjang nung tembangba telok Kerala Blasters nungi asayatsü.
ISL ajanga club shia nem 2016 küm asayartem rongnungi senior asayar ana aser U-21 nungi asayar asem, ta ayutsü atema temelaba agüja lir. telok ti senteper India nunger asayar 22 bo shimtetogo, ajisüaka Delhi Dynamos pur-i asendenshir tenzüktsü asoshi tang tashi nung asayar kata alia mali.
Lyngdoh aser Anas na FC Pune City aser Delhi Daynamos nati yokadok aser parnok alitsüba atema jenjang crore 1.10 adaktetja lir, ta osang ajanga metetdaktsü.
Jenjang tasak asayartem rongnung Subrata Paul (lakh 87), Pritam Kotal (lakh75), Robin Singh (lakh 65) aser Arindam Bhattacharya (lakh 64) nunger densema lir.
Telok ajak atema salary cap (India aser bendanger asayar) crore 18 nung züngzükja lir aser bendanglen nungi asayar ka alitsü asoshi sen crore 12.5 dak tali mamshitettsü. Anungji telok ajak atema India nunger asayar alitsü asoshi sen tajemtiba agi crore 5.5 angur.
ISL 2017-18 Player Draft nung round 15 alitsü. Round shia nung koba club-i asayar tama shimtsüar ibaji draw ka asüba sülen jangjatsü.
ISL nung team tasen ka ama Jamshedpur FC pur-i mezüngbuba aser tanabuba round nung asayartem mezüng shimtsü, aser parnok sülen Delhi pur-i shimtsü.
Instant Trading Card koba 2015 küm tama benok, iba inyakyim ajanga team tem nem parnoki shima aliba asayartem melenteptsü asosohi maongka agütsür.
ISL temzüng kübok telok ajak nem India nunger asayar tajemba agi 15 aser timba agi 18 ayutsü asoshi melar aser iba nung U-21 nungi asayar ana kechisüdir süaka alitsüla. Squad ka nung asayar ajak agi 25 dang alitsüla aser iba nung bendanglen nungi asayar timba agi tenet dang alitsüla aser U-21 asayar kechisüdir süaka ana alitsüla (1997 küm January sülen asortem).