ISL: FC Goa telok dang senchi Cr. 11 achir

New Delhi, May 05 (Agencies): India nung ayonga asayaba tongti football asayamong, Indian Super League (ISL) temzüng ozüng alema inyakba aser ISL nem nüngmenok bener arutsüba ken o nung aitsüba sülen Indian Super League Regulatory Commission (ISLRC)-i FC Goa telok dang senchi sen crore 11 chiogo.
Kasa ken o nung ajemdaker Goa telok kibur, Dattaraj Salgoacar küm 3 tashi aser Sriniva Dempo küm 2 tashi football asayatsüren nung shilem magidaktsütsü temerenshi agütsüogo.
ISL asaya aser asayamong den sentakba sentong balala nung shilem magi longkak aitba, asaya ketdangsertem amokmerenba aser ISL nem nüngmenok bener arutsüba ken o nung ajemdaker Goa teloki taruba asayamong nung ajangzükba points 15 tashi takoksa ngudaktsütsü temerenshia par teloki nem agütsüogo.
Police-i aputsüsa Chennaiyin FC asayar, Brazil nunger Elano Blumer-i aibelena meinyakba kuli anguba sülen Justice D.A. Mehta-i aniba ISLRC mendeni FC Goa telok dang senchi achiba den külemi, par telok kibur anaji merenshir lir.
Yaküm ayonga asayaba ISL-2 final tembangba sülen Goa telok kibur, Salgaocar amakba ken o nung ajemdaker Goa police-i Blumer pua tepuokdak ayuba osang bushitetogo.
Iba final asaya nung Chennaiyin teloki goal 3-2 agi Goa telok madak takok ngua liasü.