ISL: Mumbai telok semi asayatsü jenjang angur telok 1 buba akümer

Mumbai, November 23 (Agencies): Mumbai City Football Club (FC) teloki takok ngua asayaba sülen tang tasayadak Hero Indian Super League (ISL) football asayamong nung semifinal asayatsü jenjang ajangzüker telok mezüngbuba tanü, Bodbar nü kümogo.
Mumbai teloki goal 2-0 agi Chennaiyin FC telok par quarterfinal asaya nung tsükdakja liasü.
Par teloki tan takok anguba sülen asaya 13 nung ajak agi points 22 ajangzüker telok küma, tan asayamong nung shilem agir telok tarensen nung temaba jenjang abener telok kümogo.
Par teloki Delhi Dynamos telok den taruba December ita 3 nü asayatsü lemzüka lir aser iba asaya nung tamakok ajuru aka, par teloki tan asayamong nung temaba jenjang abener telok 4 rong nung densemtsüsa jenjang tajung ngua lir.
Mumbai telok sülen anidaka, FC Goa teloki asaya 11 nung points 11; Chennaiyin FC teloki asaya 12 nung points 14 aser FC Pune City teloki asaya 12 nung points 15 ajangzüka lir.
Tanü asaya nung Matias Defederico-i minute 32 buba nung goal takok ngua agüja, par Mumbai telok jenjang tajungba kümdakja asayaba sülen külem asayar, Krisztian Vadocz-i minute 60 nung 2 buba aser takokba goal agüja, par Mumbai telok nem takok ngudaktsü.