ISL: NE United-i goal 3-2 agi FC Pune City akok

Guwahati, December 02 (Agencies): NorthEast United FC teloki par tatembangba league asaya nung FC Pune City telok madak goal 3-2 agi takok ngua tang tasayadak Indian Super League (ISL) asayamong semifinal nung shilem agitsü jenjang angutsüsa tanü Bodbar nü asayaogo.
Cesar Farias-i aniba NorthEast teloki tanü takok anguba sülen ajak agi points 20 tashi ngua tan asayamong nung shilem agir telok temaba tarensen nung 4 buba jenjang nguogo.
Ajisüaka, Pune aser Chennai na tsüngda tan Honibar nü par tatembangba league asaya tembangba sülen ang NorthEast teloki semifinal asayatsü mesüra masayatsü osang jangjatsü.
Tanü asaya tenzüker minute 4 buba nung Argentina nunger Nico Velez-i par NorthEast telok asoshi 1 buba goal agütsü.
Ajisüaka, City asayar, James Bailey-i minute 8 buba nung goal 1 agüja telok anaprongla kasa jenjang kümdaktsü.
Minute 10 shi lir külen Diomansy Kamara-i minute 18 buba nung goal 1 agüja par NorthEast telok goal 2-1 agi temaba jenjang nung ajungkettsü.
Külem asayar, Andre Bikey-ia minute 43 buba nung goal 1 agüja par NorthEast telok goal 2 agi temaba jenjang nung yutsü.
Tesülen, minute 86 buba nung City’er tongti asayar, Romania nunger Adrian Mutu-i goal 1 agüja par telok jenjang tajungba kümdaktsü saka tatem nungbo par teloki tamakok ajurutsüsa aküm.