ISL:1buba semi final leg nung Kerala Blasters-i 1-0 agi Delhi Dynamos kokogo

Kochi, December 11 (Agencies) : Deobarnü Jawaharlal Nehru Stadium nung Kerala Blasters nungi asayar, Republic of Haiti nungi international asayar, Kervens Belfort-i par telok atema takokba goal yoka tang tasayadak ISL mezüngbuba semi final leg asaya nung Delhi Dynamos madak takok nguogo.
Kerala-i iba asayamung nung trokben buba atonga atonga akokba asaya ya nisung 50,000 shi sendena repranga liasü aser parnoki minute 65 buba nung takokba goal ji yok.
Delhi Dynamos-i asaya tetenzüklen kanga junga asayaba ajanga telok ola madoki aküm. Asaya tenzüker minute 10buba nung par telok nungi Malouda-i goal ka tera agi meyok aser iba sülen Kerala telok pur tetsübu ajak sama.
Ajisüaka Delhi nungi goal timtiba yoka alisang asayar Marcelinho Pereira-i maneni ano minute 35buba nunga goal yoktsü meranga liasü.
Kerala-i tanü takok anguba ajanga December 14, 2016 nü New Delhi nung asayatsü aliba tanabuba semi final leg nung Sachi Tendulkar’er teloki maongka tajungba angutsü.
Iba asaya masayadang Kerala-i tan ISL asayamung nung asaya pungu tashi atonga atonga koker liasü.