Islam nunger sarasadem mesütetba ajanga Kenya nung Khristan ka tepset

Rongjui/Sept. 19, 2018 (Agencies): Islamist telungpur Al-Shabaab telok nungi südi ta temulung melemteti alirtemi Rongjui/September 14 nü Kenya anüdoklen bus ka nung mena alir ana Islamic yimsü indang sarasadem magitetba ajanga tespet.
Iljara aser Sangailu jila tsüngta Garissa-i aoba mapang nisung tenet arua bus ya anendaktsü aser yangji mena alirtem dang ID sayutsü ashi, ta tenük kuli alir kati osangbener dang ashi.
Iba sülen parnoki passenger asem shimteter parnokdang Shahada (Islamic prayer of faith) aser Suratul Fatiha (Quran mezüng tapu) nungi tekong tenet azüngtsü ashi,” ta tenük kuli alir tesayur kati ashi.
Par asem rongnung nisung anati iba mapa meinyaktet aser tena nem kasa tesem nung tasüba temerenshi agütsü.
Asür ana rongnung nisung ka tenüng agi Fredric Ngui liasü aser pa ya Masalini nung aliba East Africa Penticostal Church nung tekülem mapang agiba lennir ka liasü, ta World Watch Monitor dang ashi.
Pa ya Hulugho jilai hopta ana mapa inyaktsü ao aser kidangi meyipa shilangba mapang iba lendong ya ajuru. Pa kinungtsü aser tanur ana yutsür süogo. Pa den asübila sentong ya par ki alidak Kitui County nung hopta tatemlen agitsü.
Ngui den iba bus nung inyaker Okoth tepsetba sülen telungpurtem ya arem leni jena ao.
Sepaitemi arem nungi telungpurtem aputsü mechi alilen aser anünglen nungi operation tenzükogo, ta Kenya sorkar indang regional commissioner Mohamed Birik-i ashi.
Al-Qaeda den sendaktepa aliba Al-Shabaab teloki Kenya nung Khristanpur dak küm aika nungi tenük yoka arua talisa Somalia den arra aliba tzükümlen, tekülem ki, nüburtemi amshiba tesem aser bus tem maka arur. Iba tesem nung nütsüng tajemba Khristanpur mulungjang nung tetsübu lidaktsütsü mechi item mapa tamajung inyaka arur.
Luchii/December 2015 nung bus ka Nairobi aser Mandera tsüngta jajaba mapang Islamist telungpurtemi maka nisung ana tepset. Iba lendong nung Kenya Muslim nunger kati Khristan ka kümzükba indang film tatsüka yanglu aser iba film ya Aenjeti/January nung Oscar atema nominate süa liasü.
Iba region nung Rongchii/April 2015 nung Al-Shabaab telungpurtem Garissa nung aliba university telungi ia kaketshir 147 tepset. Iba lendong nung Khristanpur ya meja meja jateta tepseta liasü.