Islam tilutsüba atema nisung ka küm 10 tepuokdak-i yok

Kuala Lumpur, Metsüremi/March 9 (Agencies): Malaysia nung nisung kati socialmedia nung Islam aser Prophet Muhammad tiluja jembiba atema küm 10 dak tema tepuokdak ayutsü atema obendang agütsüogo. Kasa ken o nung ano nisung asem aitsüogo.
Linük nung kin o kin aser tamangba yimsü dak sendakba nung tensa mejungi aruba mapang ka nung iba temerenshi ya agütsüogo, koba temerenshi tem rongnung tesashitiba ka asütsü.
Inspector-General of Police Mohamad Fuzi Harun-i ashiba agi, aija alisang yagi ken o 10 tashi nung aibelenba nangzükogo. Iba ken o nung aibelenba atema küm ka tepuokdak ayutsü mesera senchi sen 50,000 achitsü mesera temerenshi anaprongla yagi merenshir.
Ano social media amshir kati aibelenba nangzükogo aser pa indang ken o Hombarnü obendang agütsütsü. Maneni tangar anati, tenati aibelen masü ta shiogo aser tena ya bail magütsüi pua yau lir. Parnok pezüprongla ya kin o kin na tsüngda mangatettep adokdaktsüba, ozüng alema inyaktsü tangar ajungshiba aser communications network timi mamshiba atema aija lir.
“Police-i nüburtem dang tamangba yimsü mesera kin o kin tsüngda mangatettep adoktsüsa social media mesera communication network tem nung kecha upload masütsü atema tetuyuba agütsü. Iba ajanga linük nung kin o kin na tsüngda mepetmesü adokdaktsür,” ta Fuzi-i ashi.
Brehostibarnü religious affairs in charge minister Mujahid Yusof Rawa-i ashiba agi, Islamic Affairs Department-i, Islam aser Muhammad tiluja züluba mita atatsü atema unit ka tentetogo.
Paisa, ministry-i tamangba yimsü tsütsü aibelenertem shinga dang tai matoktsü aser aibelena alirtemnem tapet temerenshi agütsütsü, ta ashi.