Islamabad nung Quadrilateral Coordination Group senden amener

Islamabad nung amenba Quadrilateral Coordination Group (QCG) senden nung Pakistan National Security Advisor Sartaj Aziz (Tiyongtsü)-i Afghanistan, US aser China ketdangsertem den aroki shilem agiba noksa nung angur. (Islamabad, February 06)

Islamabad, February 06 (Agencies): Afghanistan sorkar aser Taliban telungpur telok na tsüngda yimjung tezüngzüktep agidaktsütsü asoshi tentetba Quadrilateral Coordination Group (QCG) teloki Pakistan yimtiba, Islamabad nung tongti senden ka tanü, Honibar nü amenba osang jangjaogo.
Tanü senden nung shilem agirtem, United States, China, Afghanistan aser Pakistan nungi ketdangsertemi Afghan sorkar aser Taliban telok na tsüngda tongpang raraba anenja par telok anati asangsang nung yimjung tezüngzüktep agidaktsütsü lenmang aser tasa bushitsü alizüng yur tan senden ayonga amener lir.
Afghan sorkar den yimjung senden amentsü memelungi aliba Taliban telok mesüzüka par teloki yimjung senden nung shilem agidaktsütsü nükjidong nung QCG teloki taoba mapanga Islamabad aser Kabul na nung anaben tashi senden amen saka senden anaprongla tamakok nung tembanga liasü.
“Tan senden amenba ajanga asenoki Afghan sorkar aser Taliban telok na tsüngda yimjung tezüngzüktep agitsü lenmang tajung ngutettsü imlar,” ta Pakistan National Security Advisor, Sartaj Aziz-i tanü senden nung metetdaktsü.
Ajisüaka, yimjung sendenji amajok nung amener lir ta shia, Taliban lenirtemi Afghan sorkar den yimjung senden amentsü memelungi aliba osang metetdakja lir.
Tang tepuokdak puoka alir züngsemtem chioktsü, United Nations (UN)-i par lenirtem anema benokba senzüsenpongtsü aser rongsenren tenokdangbatem agientsü aser bendang linük mitkar ajungai Afghanistan toktsüba sülen ang par teloki Afghan sorkar den yimjung senden amentsü takhangba ka Taliban lenirtemisa benoka lir.
Taliban teloki yaküm 2015 küm July ita Islamabad nung amenba yimjung senden nung shilem agiba sülen Afghan sorkar den maneni yimjung senden amentsü renem saka par lenisang, Mullah Omar asüba osang jangjaba sülen par teloki yimjung senden nung shilem magitsü lemtetshiogo.