Islamic Cooperation senden nung Sushma Swaraj adentsü

New Delhi, February 23 (Agencies): Taruba ita Abu Dhabi nung Organisation of Islamic Cooperation (OIC) senden amentsü, aser iba senden nung adentsü atema India linüka jaokogo; ajioda India External Affairs Minister, Sushma Swaraj-i iba sentong nung tetushi tejaoker ama adentsü.
OIC nung ya Muslim nunger nütsüng timba aliba linüktem züngsem lir.
Ministry of external affairs-i OIC-i India jaokbaji pelaa agizüker, ta metetaktsüogo.
India nung Muslim nunger nütsüng 185 shi lir, aser iba senden nung adentsü atema India jaokba ajanga India-i Islam linüktem atema mapa tajung inyakba shisanger.
Ketdangsertem osang ajanga ashiba agi, tang mezüng Organisation of Islamic Cooperation (OIC) senden nung tetushi tejaoker ama India jaoker.
46buba OIC indang council of foreign ministers senden ya March 1-2 anogotem nung Abu Dhabi nung agitsü.
Taoba hopta Pulwama nung kiralongrartemi CRPF amakba sülen India-i Pakistan linük ya alima linüktem nem sendokdaktsütsü atema inyakba mapang ka nung OIC-i parnok senden nung India jaoker.
Teti agia OIC-i Pakistan jaoker aser Kashmir onük nung Pakistan pusema arur.
MEA sangdong ka ajanga ashiba agi, United Arab Emirates Foreign Minister, Sheikh Abdullah bin Zayed Al Nahyan-i OIC senden nung tetushi tejaoker o jembitsü atema Swaraj jaok; yamaji India-ia pelaa agizükogo.
MEA-i sangdong ka ajanga, “Onok jaokba ya UAE den asen linük tesendaktep nung alizüng ka tongteter ama züngshir. Onokisa iba senden nung adentsü atema jaokba ya India nung Muslim nunger nütsüng 185 aliba aser parnoki linük atema inyakba, aser India-ia Islam linüktem atema inyakba asoshi züngshiba lir ta bilemer,” ta metetdaktsü.
Anungji India-i pelaa agizüker aser iba atemaji UAE lenirtem dang pelar, ta ministry-i metetdaktsü.
Yaküm Bangladesh-i Organisation of Islamic Cooperation nung India ama Muslim nütsüng ajema aliba linüktem “observer state” ama shimtsü benoka liasü.