Islamic kiralongraba dang nungi Hindu linük akümtsü merangbaji tamajungba

New Delhi, March 16 (Agencies) : Hindu linük kümdaktsünüba tebilemba anema India kanga saksalemtsüla ta puti otsü bushir mongin aser kaketzülur Ramachandra Guha-i ashi.
New Delhi nung anogo pungunü ‘Spring Fever’ ta ser kaketkeno benjung nung jembidang, Guha-i ashiba agi Partition süli aser Ram Janmabhoomi movement mapang Hindu nationalism adokba sülen tang iba mopungsem kanga sashia aoner.
‘Spring Fever’ benjung ya Penguin Random House ajanga ayongzüka amunger.
“Linük nung Hindu nationalism mopungsem sashia aonbaji tang tasen masü. Partition süli aser Ram Janmabhoomi movement mapang iba mopungsem aon aser anaprongji Rashtriya Swayamsevek Sangh (RSS) ajanga adokdaktsü. Tesüiba mapang adokba Hindu nationalism ajanga linük nung tamangba yimsü, sobaliba aser yimtenren talenba raksatsü aser tanbo iba tensaji majurutsü imlar” ta Guha-isa ashi.
India nung Islamic terrorism dang nungi Hindu fundamentalism tamajungba, kechiyong India sasep nung Hindu nunger noklang nung shilem 85 lir. India nung Hindu nunger teimba ta ser yimsü masür saka iba amaji atalokra kanga tetsübutsüka asütsü, ta paisa shisem.
“India nung tang adokba Hindu fundamentalism ji state kar nung dang lir. Karnataka, West Bengal aser Maharashtra state tem nungbo iba khuret mali saka Uttar Pradesh nung iba mapa inyakba atema shisabulua bilemer kechiyong iba state ya kanga tulu. India nung lendong aketba yimsüsür tamajungba anaji- Amit Shah aser Azam Khan na lir,” ta Guha-isa metetdaktsü.
Bharatiya Janata Party (BJP)-i yimten tesayuba sülen anidakertem anitetba nung tamakok nguogo. Parnoki shisashir ka danga manitet aser Gujarat nung küm aika sorkar tashi nung liaka, parnoki scholar ka danga madokdaktsütet. Anupam Kher, Praveen Togadia mesüra Smriti Irani nunger amala otongdar menüngdak, kechiyong item nisung jagi mangatettep ang tali adokdaktsütsü. Yimten mapa nung RSS-i shilem agi tashi, yimten tesayuba sülen anidakba lennir ka danga madoktsü. RSS ji tangatetba nung anünga alirtem indang telok ka lir, ta Guha-isa ashi.