Islamic kiralongrar nisung 41 puogo: Indonesia police

Indonesia police ketdangsertemi Indonesia kübok Malang yimti nung Islamic kiralongrar ta temulung melemi bilemba nisung ka’er ki mitdang agiba noksa ka yangi angur. (Malang, February 20)

Jakarta, February 20 (Agencies): Indonesia police ketdangsertemi Islam tamangba yimsü nung ajemdaker ozüng alema kiralongratsü maparen inyaker ta temulung melemi bilemba nisung 41 tashi apuba osang ka tanü, Honibar nü metetdaktsüogo.
Islamic kiralongrartemi Indonesia kübok Jakarta nung taoba January ita lendong kanga sashia atalokdaktsüba sülen latetba kiralongrar anemtsü ozüng tasenba mapa küma benshitsü tenzüka, police ketdangsertemi tan Indonesia nung tongti asetkong, Java nung kiralongrar ta temulungi melemi bilemba nisungtemji mita apur lir.
“Mount Sumbing nung tentetba jihadi tesep nung tongpang raratsü aser mitkar terenemshiba agia alir nisung 36 tashi police ketdangsertemi tanep apuba osang tang tashi nung jangjaogo,” ta Central Java police otongdar, Co. Liliek Darmanto-i metetdaktsü.
Police ketdangsertemi tan apur kiralongrar ta temulung melemi bilemba nisungtem ket nungi tongpang nung amshitsü prangpong, kotari, jihadi kaket aser wako-tem bena aruba osanga jangjaogo ta pai ashi.
East Java province kübok Malang yimti nunga police ketdangsertemi par mitsü sentong agiba sülen Islamist kiralongrar ta temulung melemi bilemba nisung 5 tashi yashi, Hokolbar nikongtsütsü apuba osanga jangjaogo.
Sorkar nem kiralongrar ta temulung melemi bilema apuba nisungtem ita 6 tashi pua ayutsü temeten agütsütsü densema, kiralongrar anema raratsü ozüng tasenba agizüka kasaji benshitsü asoshi Indonesia sorkari parliament nung onük benoka lir.