Islamic scholar Naik-i kiralongrartem aitsür

New Delhi, July 07 (TYO): Dhaka nung kiralongra mapa inyakertem ajungmeso ta tai tonglokja alir Mumbai nung Islamic scholar, Zakir Naik-i,  pai kiralongraba pu masemer ta metetdaktsü.
Pai Islam aser kiralongraba indang onük jembibatem mashileni meyipzüka amshir aser nisung kari pa tenüng tim mesüi amshir, ta Naik-i ashi.
Naik ya Islamic Research Foundation tenzüksang lir aser pai osangbener dang ashiba agi, pai jembiba onüktem ajanga nisungtem ajungmesor aser Islam dangi anir arur.
“Muslim mesüra non-Muslim asünunga, nisung tepseter ajak molumii aotsü” ta paisa shisem.
“Islamic State tenüng amshiba ajanga parnoki Islam sensatsür. Parnokji anti-Islamic state of Iraq & Syria lir aser parnoki tai maketba bendanger aika tepsetogo” ta Naik-isa metetdaktsü.
Islamic scholar Naik-isa, “Ni kodanga Muslim nunger kiralongrar akümtsü atema tayongzükba magütsü. Lokti anema inyakertem den dang Muslim nunger ajak kiralongrar asütsüla ta ni jembi. Muslim nunger shingaia tai maketba meimchir dak kiralongra mapa meinyaktsüla” ta ashi.
Tashishitsü aketba Islamic sayutsüngir, Zakir Naik anema mapa inyaktsü ta Centre sorkari osang ka metetdaktsüba sülen anogo ka lir Naik-i iba osang metetdaktsü.
“Zakir Naik-i jembiba onüktem atema khuret süa bilemer. Ozü agency temi iba atema mapa inyakdar, saka minister ka ama, kechi komala mapa inyaktsüar ni mashitsü” ta yashi Minister of State for Home Affairs, Kiren Rijiju-i metetdakja liasü.
Taoba hopta Dhaka nung kiralongra mapa inyaker rongnung Rohan Imtiaz-i yaküm Facebook nung Naik indang onük ka amshia osangtsüsang prokshia liasü.
Naik-i tanga tamangba yimsütem anema jembiba agi UK aser Canada nungbo pa noktanger. Malaysia nung Islamic scholars 16 ‘banned’ asüba nung pa densema lir.
Pa ya Bangladesh nungbo kanga dang nüngtugu lir aser pai pa indang Peace TV ajanga sayutsüngir. Pai mapang shia tanga tamangba yimsütem aser tanga Muslim teloktem anema jembir.