Islamic State-i ‘Jihadi John’ asüba osang jangjatsür

Dubai, January 20 (Agencies): Islamic State den tesentaktep aliba media outlet kati Mongulbarnü “Jihadi John” nem tenüngsang agütsüba sangro ka sayaogo.
“Jihadi John” ta ajasang ya Mohammed Emwazi liasü aser pa ya Arab nunger British senso ka liasü ta jangjaogo. Yaküm November ita U.S-i Jihadi John tepsetogo ta kuli agüja liasü.
Islamic State indang Dabiq magazine nung parnoki Emwazi dang “Abu Muharib al-Muhajir” ta aja.
“Brihostibarnü 29 buba Muharram, 1437 (Nov. 12, 2015) nü Abu Muharib-i Allah atema taküm bendanga agütsüogo. Raqqah yimti nung pa mena aliba gari ka unmanned drone kati poksatsüdang pa asü aser iba ya pai mapang talangka nungi aginüa aliba liasü” ta Dabiq osangkaket nung zülua lir.
ISIS-i pua tepsetba U.S. journalists Steven Sotloff aser James Foley, U.S. aid worker Abdul-Rahman Kassig, British aid workers David Haines aser Alan Henning, Japanese journalist Kenji Goto aser tangartem tepsetba video tem nung Emwazi-i shilem agi aser ibaji ajanga pa alimai meteta aküm.
Emwazi ya 1988 küm Kuwait nung aso aser iba sülen pa arishi küm 6 asüdang par kibong Britain nung alitsü ao. London nung pai computer programming nung graduate asü.
Ita aika sentong renema yur külen yaküm November ita Syria kübok Raqqa nung U.S.-British missile strike ka nung Emwazi tepset, ta US ketdangsertemi ashi.