Islamic State-i nisung 4000 adenba ‘kill list’ ka saya ; India nunger 285 dena lir

New Delhi, June 26 (Agencies): Islamic State of Iraq and Syria (ISIS) ta ajaba kiralongrar telok den sendaktepa aliba Caliphate Cyber Army (CCA)-i alima nung nisung 4,000 den tema tepsettsü atema “kill list” tasen ka sayaogo aser iba nungji India nunger 285 dena lir.
Osang ka ajanga ashiba agi, ‘kill list’ nung aliba India nunger dak alia tesadang kaji America, UK, France aser Canada sensotem lir. Iba list nung nisung tenüngtem den külemi parnok indang talidak aser email tem agüja lir.
Caliphate Cyber Army (CCA) ta ajaba hacker teloki iba ‘kill list’ ji encrypted messaging service, Telegram ajanga belenshi aser parnoki ISIS pusemer ajaki item nisungtem amaktsü tayongzükba agüja lir.
“Islamic State atema tsünütem ajak, iba ya kanga dang tongtibang ‘list’ ka lir, parnok tangsa tepsetang” ta Hokolbarnü hacker telok CCA-i sangdongba osang International Business Times ajanga metetdaktsü.
Nisung kari iba list ya UCC (United Cyber Caliphate) ajanga saya ta ashir, ajisüaka ISIS pusemba hacker teloktem April 2016 nung ka küma longjemba sülen CCA-i UCC nung züklok, anungji hacker telok anaprongi iba list atema tenüng agitsü akok.
ISIS indang ‘kill list’ nungji sorkar ketdangsertem den yaritepa kiralongrar anema mapa inyakba Indian software engineer tem teimba lir, ta osang ajanga metetdaktsü.
April 2016, UCC-i parnokji ISIS atema hacking kongsang ta sangdongba sülen New York nung alir meyirjang aika adenba ‘hit list’ ka saya.
Ajisüaka, iba list ji tejen ka liasü ta bushitet, anungji tan sayaba ‘kill list’ jia kasaji asütsü akok ta bilemer.

You must be logged in to post a comment Login