Islamic State-i video tasen ka ajanga Israel amokmerener

 

Jerusalem, October 20 (Agencies): Nüburtemi kanga tsübutepba, Islamic State (IS) telungpur-i video tasen kar ajanga, parnok tang alima tesem tangalen rarar ajisüaka Israel daka tenük yokdar, ta Israel amokmerena ashiba mapang IS-i, “Onok Israel-ia aittsü,” ta ashi.

Tan Israel nung aliba jihad asoshi raratemi kotari agi lendong agütsüba tenüngsang ashiba mapang ISIS telungpuri hopta piyong atalokbatem indang video aika social media ajanga prokshiogo.

Nineveh, Iraq nung Angh office ajanga mezüng video ka sayaba nung Jerusalem nung aliba Al-Aqsa Mosque ya netsüng tajemba kin, Yihuda nungeri amanglema teraksa bener aru, ta shia lir.

“Azü (Yihuda nunger zü) ajanga parnok tzüra atemtsü asoshi kotari aser noklang nok amshitsü tenzükogo, “Tenük melen tenük,” ta Israel website, Ynet nung enokja aliba video nung o jembisangi (narrater) shia lir.

Tanga Islamic State telungpuri video nung Palestine nungeri tawa inyakba sanga shia lir.

Tan atalokba rara nung tajemba agi Palestine nunger 41 aser Israel nunger ti taküm samaogo.

“Jesusalem nung jihad asoshi rarartem dang sangdonger— Yihuda nunger anema jihad-i melaba ama inyakba asoshi nenok tenüng asanger,” ta video ka nung shia lir.

“Yihuda nunger akoksatsütsü asoshi nenok temang aser shisatsü kanga junga renemshiang,” ta ashiba video nung Israel Ato Kilonser Benjamin Netanyahu meyong noksa ka adoka, parnok gari bomb ajanga aoksaja temang poksabaji tesem ajaklen prokshidakjang,” ta video nung o jembisang jagisa shia lir.

Kasa nisungisa, “Islam sepaitem Iraq, Syria, Khorasan, Caucasus, aser West Africa nung raradar ta metetang, ajisüaka onoki Jerusalem nung tenük yokdar aser onok Jerusalem-ia aittsü,” ta sangdongogo