Islamic State kiralongrar, Abu Zaid Mumbai nung puogo

New Delhi, November 05 (Agencies): Islamic State kiralongrar asütsü südi, ta mulung melemteti alisang, Abu Zaid Mumbai Mumbai airport nung Uttar Pradesh Anti-Terrorism Squad-i puogo.
Osangbenertem den jembidang ADG (Law and order), Anand Kumar-i, “ISIS kiralongrar asütsü südi ta mulung melemi alisang, Abu Zaid Saudi Arabia nungi aruba sülen yashi ATS team-i Mumbai Airport nung puogo,” ta metetdaktsü.
“Pa Lucknow-i anir aotsü aser okadaki anir aotsü. Pa dang asüngdangyatsü atema onoki pa police custody-i anir aotsü,” ta ADG-i ashi.
Riyadh nung alisang, Zaid-i social media group ka lapoka lir, aser iba group ajanga pai lanurtem ISIS nung adentsü atema mesüzker. Bijnore aser Uttar Pradesh nung IS pur südi ta mulung melemteti police-i pua alirtem den tamalen pai tongtepratepa aliba jangjaogo.
Taküm April ita nung ATS-i ISIS kiralongrarten- Umar (Nazim), Ghazi Baba (Muzammil), Mufti (Faizan) aser Jakawan (Eihtesham) nunger pua liasü, aser parnok dang asüngdangyaba mapang nung Abu Zaid tenüng jungkai adok.
“Parnoki Internet nung application ka ajanga tongtepratepa liasü aser shisa agütsüsangji Zaid liasü,” ta ADG-i ashi.
Brihostibarnüa Kerala Police-i Kannur nungi lanur trok Syria linük nung Islamic State telok nung adenba osang metetdakja liasü. Police-i ashiba agi, item lanurtemji Kerala nung aliba Popular Front of India (PFI) nung inyakertem liasü.
Taküm October 25 nüa Valapattinam police-i IS den tesendaktep alir nisung asem- Mithilaj, Abdul Razzak aser Rashid nunger apu.
Osang ajanga ashiba agi, Syria aser Iraq nung India nunger nisung 100 jungnüai Islamic State atema raratsüdar.