Islamic State maparen mita reprangdar: Sorkar

Hyderabad, October 07 (Agencies): Kiralongrar telok, Islamic State (IS) linük telungi maitdaksütsü asoshi Centre sorkari IS maparen mita reprangdar, ta tanü Union Minister of State for Home, Haribhai P Chaudhary-i ashi.
Linük nung IS anema BJP-i aniba NDA sorkari kechi merasa agidar ta asüngdangba langzüdang pai, “Onoki ISIS maparen junga reprangdar. Hyderabad kija nung masü saka online (Social media ajanga IS den tongtepratepba) ajanga inyakertema onoki puogo. Lanur karbo mashileni anitsü akok, saka ISIS India telungi maitdaktsütsü atema onoki parnok maparen mita reprangdar,” ta ashi.
Hyderabad ama yimti nung IS nung adentsü tebilemba alir lanur aika police-i puogo aser counseling agütsüogo, ta paisa ashi.