Al Shabaab kiralongrar telok kati Somalia yimtiba, Mogadishu tzüyimkümlen lendong tesashi ka yasüng Brehostibar aonung atalokdaktsüba sülen nisung kati tenu tasümang ngua temulung shiranga ajeba noksa nung angur. (Mogadishu, January 22)
Mogadishu, January 22 (Agencies): Tongpang nung amshitsü prangpong abener Islamist kiralongrar telok kati pokshiba lendonga atalokdakja Somalia yimtiba, Mogadishu tzüyimkümlen nisung 20 shi yasüng, Brehostibar aonung tepsetba osang ka Somalia police-i tanü Hokolbar nü metetdaktsüogo.
Yasüng amaker nisung 5-i car gari nung alenokba bomb ana tashi pokdaktsüba den külemi prangpong injang yoka Lido tzüyimkümlen tentetba Beach View Café chiyongtsü ayokdak aser temeket nung sentepa alirtem amakba osang jangjaogo ta parnoki ashi.
“Ozü mitkartemi tanep 3:00 ako tashi tongpang raraba sülen tan amaker 4 tashi tepsetogo. Tan lendong nung nisung 20 shi asüba aser ano, nisüng 20 dak tema yiruba osang tang tashi nung jangjaogo,” ta Mogadishu police lenir, Osman Nur-i osang jangjashitsü.
Tan lendongji par teloki atalokdaktsü ta shia, al Qaeda telungpur telok den sentaktepba Al Shabaab kiralongrar teloki tan lendong atalokdaktsüba atema tenüng agia metetdaktsüogo.
“Ozü miktartemi nübur noklang aika taküm kümzüka anitetba den külemi, parnoki tan amaker nisung 1 taküm pua lir,” ta Somalia Security Minister, Abdirizak Oma Mohamed-ia osang jangjashitsü.
West-i nungitba Somalia sorkar jirepja Somalia ajunga nung Islam ozüng benoktsü nükjidong nung Al Shabaab teloki 1991 küm nungi tenzüka Somalia nung tentetba chiyongtsü ayokdak aser nübur longsoa aliba tesemtem nung tan amala lendong mapang shia atalokdaktsüba osang bushiteta lir.
“Kiralongrartemi tan lendong atalokdaktsüba maparen ya kanga sashia aitsür. Tan amala lendong atalokdaktsüba ajanga ozü sorkari ayuba Somalia linük temaba jenjang nung ajungkettsütsü alizüng meraksatsütettsü,” ta Somalia Tir, Omar Abdirashid Sharmarke-ia metetdaktsüogo.
You must be logged in to post a comment Login