Nairobi, February 15 (Agencies): Islamist kiralongar telok, al Shabaad-i bomb lendong ka atalokdakja tesüiba Somalia defense minister, Muhayadin Mohamed pokseta tanü, Hombar nü sükdaktsüogo.
Al Qaeda telok den sentaktepba al Shabaab teloki car gari nung bomb alenoka yutsüba sülen Somalia parliament speaker advisor menden abensang, Mohamed-ji pokseta südaktsü ta police-i metetdaktsü.
“Ozü teloki Mohamed amenba gari nung pokshiba oset alenoka yutsüba sülen kasaji pokdakja Mohamed tepsetogo,” ta al Shabaab otongdar, Sheikh Anbdiasis Abu Musab-ia Mohamed tepsetba atema tenüng agia metetdaktsüogo.
“Kiralongrartemi bomb pokdakja Mohamed tepsetogo. Ajisüaka, Mohamed den gari telung nung mena alir nisung ka tera yiruba dak alaka pa taküm lendong nungi kümzükogo,” ta tongti police ketdangser kati osang jangjashitsü.
Mohamed-i United Nations (UN)-i nungitba Somalia sorkar nung defense minister menden 2008 küm mapang tatsükba asoshi abenba den külemi, pai Mogadishu aser anameta tesemtem nungi al Shabaab telok makdoktsü tongpang nunga African Union mitkartem den aroki shilem agiba osang bushitetogo.
Al Shabaad teloki 2011 küm Mogadishu yimtiba toktsüba sülen 2012 küm nungi tenzüka, iba yimti nung Somalia sorkar kanga junga amenoka lir.
Somalia ajunga nung Islamic sharia ozüng benoktsü merangba al Shabaab teloki Somalia nung tan amala lendong balala mapang shia atalokdaktsüba osanga bushiteta lir.
You must be logged in to post a comment Login