Israel aitsüdang mapang tesadangka endoker : Nikki Haley

Washington, Metsüremi 06 (Agencies) : Israel nunger aitsüba maparen nung linük 198 agi akümba United Nations-i par mapangji tesadang kabo endoker saka Israel nunger mezüngmeshibaji laibo khenyongi magizüktettsü, ta US envoy, Nikki Haley-i UN aitsüogo.
La India nunger agi America senso akümba otsüren aser South Carolina kübok lar tsürabur den la intetba jila nung lai koma timtem ajangshia aru, item indangji atishia jembidang Ms Haley-i ashiba agi, mezüngmeshiba maparenjibo (bullying) lai khenyongi maremzüktettsü.
“Ni ina atuba mapang South Carolina anüolentip tsütsü jila tila ka nung India nunger kibongji onok dang liasü. Onok külemi lokti nung alirtemji tembartem amai dang liasü aser kati ka yaritepa aru. Aji oda süaka, anogoshi tajung dangbo maliasü. Ozü tsüraburtemji bendang linük nungi aruagi alirtem liasü. Obalai tekolak nung sü alenlok aser ojalai sari agi. Mapang kar nungbo onok mezüngmeshia liasü,” ta US ambassador to UN, Nikki-isa ashi.
“Ni mezüngmeshidang ni anema nokdak aser kasaji UN nung Israel nunger tsübudakja amokmerenra ni nokdaktsü,” ta arishi küm 46 tain, Haley-isa ajang-ajanga metetdaktsü.
“Linük 198 agi akümba telongjemi Israel kija anema jembidang mapang tesadangka endokbaji nibo khenyongi maremzüktettsü aser yamala mezüngmeshiba maparenjibo meinyaktsüla,” ta lai ashiba mapang senden nung alirtemi nokdaker la nem akümtsübu agütsü.
India nunger agi America senso kümer alirtem rongnungi US presidential administration kübok Cabinet rank jenjang nung inyaktsü mezüngbuba maongka ngutetlaji Haley lir.