Israel anema rara

Israel, ta ajaba linük ya kidanger linüktem den medemdangra kanga tila ka dang. Küm 2,500 tejaklen yangi alir chichiba Yihuda nungertem linük balalai prokshia aoba sülen Assyria nunger, Babylon, Persia, British, Roman, Turkey aser Greek nunger arua ali. Linük tila aser nütsüng ishika dang süaka tanü alimai Israel linük nung kanga ranglokba kuli aikati shisadanger. Akhi mapang nungi Israel nung rara balala aika rara-a aruba otsü asenoki Laishiba nung angur, aji oda putu ajak nung parnok rara ka mesüra ka nungbosa mazüngi aliba tanü tashi kasa dang. Israel nunger rara tatalokba shia nisung aikati, iba ya tatembang anogo anasai aruba temaitsü südi ta bilemer. Akhidang nungi Israel nunger Egypt, Amalek, Midian, Moab, Philistine, Assyria, Babylon mesüra Persia nunger den raraa aruogo aser tang tashi kidanger linük ka mesüra katibo parnok nem timtem agüja arur. Israel linük asoshi Tsüngremer sentong tajung ka lir, ibayongji temeneni mapa inyaka tesempa agi mapang ajak nung kidanger linüktemi Israel samadaktsütsü meranger. Taoba mapang Assyria Chuba Sennacherib, Nazi Germany lenir Hitler aser Iran Tir Rouhani nungeria Israel linük khenyongi samatsütsü merangdangogo, ajisüaka makok. T. Ken 83:4 nung “Parnoki shiogo, Arung, aser parnok kin ka mekümdaktsüi raksatsüdi; Oda Israel tenüng joko mebilemtettsüsa” ta shinzüka lir, aser shina aliba ama Hamas Charter-i “Islam-i khenyongi mesamatsü tashi Israel ya alitsü aser maneni alitsü” ta ashi, 2012 küm Iran Tir-i, “Middle East nung Israel ya tera-yanga mali aser samatsütsü,” ta jembi, 2012 kümsa Ayatollah Ali Khamenei-i, “Israel ya cancer komo ka lir, aser ibaji alangdoktsüla” ta ashi.  Laishiba ajanga, tatembang anogo atongtsü nung Israel nung rara tesashi alitsü ta shia lir. Küm 2500 tejaklen Israel nunger tesem ajaklen prokshi ajisüaka, tatembang anogo anasa Israel chirtem ajak adenshitsü (Eze 37.21), Yihuda nunger ajak Israel linüki meyipa arutsü (Tazüngkunem 30:3), iba dak alia Israel dak sentakba tatembang anogo temaitsü aika Laishiba nung shia lir. Tatemsabo alima linüktemi Israel sentoktsü aser la anema noktaktsü ta shin-a lir. 2012 küm UN-i Israel jakdaka anemba telatetba 79 yangluogo, iba den külemi UN Human Rights Council Resolutions shilem 40-i Israel anemer. Iba ya mamangtettsüka lir, kechiyong Middle East nung chichiba loktiyimten aliba linükji Israel dang lir. Tanü-a Israel nung mepetmesü jenti lir aser lar tsükchirtem- Syria, Lebanon, Jordan, Saudi Arabia, Hamas, Islamic Jihad, Hezbollah aser Iran linüktemi Israel meketbanga lir. Shin otem ajangasa anüdoklen linüktemi yimtenren nung Israel anemtsü aser Arab-Muslim linüktemi Israel anema inyaka tatemsa Israel linük anema rara tulu adoktsü shia lir. Tatembangbuba rara Armageddon tongbang ya tesem ka tenüng agi Armageddon (J. Adok 16.16) nung adenshia raratsü. Iba tesem ya Israel anüdoklentip tsütsü Carmel tenem anasa Jezreel lenden nung lir. Iba tesem ya nisung jenti adenshia rara tulu raratsü asoshi kanga tetemjen tesem ka lir, aser iba tesem nung Yirusalem anema tatembangbuba raraji raratsü, koba dang Khrista aser par sepaitem anema tatembangbuba rara ta-a ajar. Atangji Israel rara tatembangbubaji tongbang rongnung tongbang ka asütsü südi.