Israel aser Gaza na arrtsü shibangogo

Gaza, March 26 (Agencies) : Deobarnü Palestine Islamist telok, Hamas nung lenir tejen ka khasetba sülen parnoki Gaza Strip aser Israel na tsüngda senzüsempongba lenmang ka tang aliba ibaji shibanga yutsüogo.
2011 küm Islamist telok aser Israel na tsüngda tepuokdak alirtem melenteptsü lemtetba ayuba inyakyim kübok Hamas lenir Mazen Fuqaha Israel tepuokdak nungi chiokba sülen taoba hopta Gaza nung memetetba nisung kari pa dak injang agi akha, ta osang ajanga metetdaktsü.
“Fuqaha tepsetba ajanga security temi Beit Hanoun (Erez) arrtsü shibangtsüsa aküm,” ta Hamas otongdar Iyad Bazm-i sangdong ka ajanga metetdaktsü.
Fuqaha khasetbaji Israel tai ta Hamas-i tai tongloktsü aser parnoki, “Tsüngrem asoshi rarartem azüji amajok masütsü,” ta shisem.
Gaza aser Israel na tsüngda ali nung senzüsempongba lenmangji Erez arrtsü ya ang lir. Iba arrtsü ajanga Palestine nunger aser bendangertem jajar. Balakata nüburtem asoshi inyakertem, osangbenertem aser diplomats tem iba arrtsü ajanga senzür.
Hamas teloki 2007 küm Gaza agiba sülen iba ama arrtsü shibangbaji tan mezüng lir.