Israel Ato Kilonser, Netanyahu-i Kenya semdangogo

Nairobi, July 06 (Agencies): Africa nung tentetba linük 4 semdangba sentong den sentaktepa, Israel Ato Kilonser, Benjamin Netanyahu-i Kenya linük yashi, Mongolbar nü semdangogo.

Netanyahu-i Nairobi yimtiba tonga aoba sülen Kenya’er Air Force mitkartemi mitkar tetushi agütsüba sentong ka ayonga Netanyahu nem tetushi agüja liasü.

Africa den tanaben sentaktepshitsü nükjidong nung Netanyahu-i tan Africa semdanger lir.

“Africa ya terenlok alitsü tenzükba continent ka kümogo aser Africa nung terenlok aliba ajanga alima ajunga nem tajangzük bener arutsütsü imlar,” ta Netanyahu-i Nairobi nung metetdaktsü.

“Kiralongrar anema raratsüren nung Israel-i Africa nung tentetba linüktem den aroki lungjemer nungdakba maparen inyaktsü renema lir,” ta pai shisem.

Ano, Netanyahu-i Kenya Tir, Uhuru Kenyatta den ajurutepdang par linük ana tsüngda shilembatsütsü aser tensa azüoktsü amaliteptsüren alitsü onük benokba osang angazükogo.

“Linük ka dang masü saka Africa continent ajungai tang ajurushia aliba tebilemtsü khuret tulutibaji tamangba yimsü kata mamanger kiralongrartemi lendong bener arutsüba lir. Africa den külemi, alimai kiralongrar den sentakba khuret ajurutsü tenzüka lir. Anungji, ozü linükia Israel den aroki lungjemer kiralongrar anema raratsüji mulunga lir,” ta Kenyatta-ia metetdaktsü.

Netanyahu-i tan Africa semdangba sülen pa küm 30 tsüngda nung Africa mezüng semdanger Israel lenir kümogo.

Taoba mapang, 1973 küm Arab-Israeli tongpang raraba sülen Israel den tesendaktep mejungi küma, Kenya densema, Africa nung tentetba linük aikati Israel den tesendaktep raksa liasü.

Ajisüaka, tanübo Israel aser Africa nung tentetba linüktem na tsüngda tesendaktep tajungba akümtsü tenzükba osang bushiteta lir.

Israel-ia Africa nungita yaritsü nükjidong nung par continent nem teyari sen, dollar sen million 13 tashi agütsütsü nangzükogo.

Tan Hombar nü Uganda semdangsang, Netanyahu-i tan Kenya semdangba sülen maneni Rwanda aser Ethiopia na semdangtsü sentong lir.