Israel den tesentaktepji India atema tongtibang: Swaraj

Jerusalem/New Delhi, January 18 (Agencies): Tanü Hombarnü India External Affairs Minister, Sushma Swaraj-i, India-i Israel den tesentaktep nung kanga temelung agüja inyaker, ta ashi.

Tanü lai Israel Ato kilonser Benjamin Netanyahu ajurua linük ana tesentaktep onüktem jembia liasü.

Swaraj-i tang mezüng External Affairs Minister ka ama West Asia semdanger aser lai Israel bangtak lenirtem ajurua jembitsü ta ashi.

“Israel den linük ana tesentaktep atema India-i kanga tongtibang süa agir. Tesüiba küm 20 shi lenla aisü nung linük ana tesentaktep inogo, saka ano tesentaktep tajungba yanglutettsü,” ta Ato kilonser majurudang lai osangbenertem dang ashi.

“Linük ana tesentaktep onük ajak nung o lemteptettsü ta ni tamang akar,” ta laisa ashi.

Ano Israel Ato kilonser Netanyahu-ia okila jembidang, tesüiba küm ishika tsüngda linük ana tsüngda tesentaktep ainer aser tembar tajung akumer, ta ashi.

“Ni na (Swaraj) yangi pelaa agizüker aser kü tembar tajung aser külem tenzüker Ato kilonser Modi dangi salem abener. Tesentaktep ainbaji Tiri (India Tir) semdangba ajanga sayuogo, ibaji India Tekolak kati tang mezüng (Israel) semdangba asütsü,” ta Israel leniri ashi.

Pai ashiba agi, science & technology, Internet, Defence aser aluyimba tsütsü linük ana tsüngda tongtepratep taliba kümdar aser amalitep indar.

“India aser Israel na maparen aisü nung amalitepdar, aser longjemer inyakba ajanga asen nüburtem aser alima asoshi ano aika inyaktettsü,” ta pai ashi.

Paisa, Israel-i India nükshir aser tembar tajung ka ama züngshir, ta shisem.

Taoba mapang Israel Ato kilonseri, India Ato kilonseri pa dang terenlok mapa balala aika atema New Delhi-i Tel Aviv nüngdaker ta shiogo, ta metetdakja liasü.

Swaraj-isa Tir Reuven Rivlin, Defence Minister Moshe Ya’alon, Infrastructure Minister Yuval Shteinitz aser deputy Foreign Minister Tsipi Hotovely nungera ajurutsü.

Israel nung India-Yihuda lokti telemsa pezü lir aser iba nütsüngji 80,000 shi lir.

India Tir kati mezüng Israel semdangbaji Pranab Mukherjee liasü. Pai Israel semdangba sülen ita asem tsüngda tang External affairs minister Swaraj-i iba linük semdanger.