Israel-i F-35 Fighter Jets 17 US nungi alisemtsü

Washington, November 28 (Agencies): Israel linüki United States (US) nungi F-35 ta ajaba fighter jet tayimtsü 17 tashi alisemtsü atema Israel’er security cabinet-i agizükogo.
Tan tayimtsü alisemtsü renemba ajanga Israel-i US nungi ajak agi jet tayimtsüji 50 tashi alizüktsü renemer lir aser US-ia mezüngbuba jet tayimtsü hopta ishika tsüngda nung Israel tongtsütsü renema lir.
Arrür radar nem meputetdaktsüi supersonic speed nung kara ayimba F-35 jet ya US nung tentetba Lockheed-Martin teloki yanglur.
F-35 jet tayimtsüji US-i yanglua rizüngba tongpang raratsü osettsüset rong nung jenjang tasaktiba aliba tongpang oset nung densema lir.
“Israel-i F-35 jet tayimtsü alizükba sülen Israel tali tashi itshia akümtsü aser ozü linüki tesem mashika nung ozü arrür den tongpang raratettsü,” ta Isreal Ato Kilonser, Benjamin Netanyahu-i jet tayimtsü alizüktsü tezüngzktep US den agiba sülen metetdaktsüba osanga jangjaogo.
Taruba küm 10 tsüngda nung dollar sen billion 38 agüja, F-35 jet tayimtsütemji alizüktsü renema lir aser iba mapatong ya US Tir, Barack Obama-i Israel nem mitkar teyari agütsütsü asoshi taküm September ita nangzükba den sentaktepa lir.