Israel-i tashiyim agi nisung alidak tentetba maparen anentsüla: Quartet

Jerusalem, July 02 (Agencies): Israel-i tashishi aketba lushi nung nisung alidak tentetba maparen anentsü tajungshiba olen ka ‘Quartet’ ta ajaba Middle East nung yimji yimjung bener arutsütsü merangba tenteti tanü, Honibar nü metetdaktsüogo.
“Israel-i mangatettep adokba lushi nung par nüburtem alitsü ki o jen renemba ajanga par linük aser Palestine na tsüngda linük ana tebentetbaren takok ngua magitettsüsa tensa bener arutsür,” ta United States, Russia, European Union (EU) aser United Nations (UN) densemba Quartet-i metetdaktsü.
Israel-i West Bank nung tashiyim agi ki o jen renemba ajanga Palestine nüburtemi terenlok angutsü maparen nem tetsükdakba bener arutsüba olen ka par tentetisa metetdaktsü.
Ano külen, Israel nung kiralongrabaren maitsüba den külemi, Islamist telok, Hamas-i amokbangba Gaza tesem nung ozüng alema tongpang nung amshitsü osettsüset bendenba maparen menokdangba atema Palestine lenirtem aitsüba olen ka Quartet-isa metetdakja liasü.
Yashi, Hokolbar nüa Yihuda nungeri tashiyim agi ki o jen renemdak, Ottniel anasa Palestine telungpurtemi nisung ka kasetba osang bushitetogo.
Anasa tentetba Hebron yimti nunga kotari agi police ketdangsertem tsüngsettsü merangba Palestine tsür ka Israel police ketdangsertemi yashi kasetba osang jangjaogo.

You must be logged in to post a comment Login