Israel-i tayimtsü amshia Damascus nung Iran dak amak

Jerusalem, Aenjeti/Jan. 21 (Agencies): Syria yimtiba, Damascus nung Iran nunger dak tenük yoker makogo, ta Israel-i ashi.
Elite Quds Force of the Iranian Revolutionary Guards aser Syrian air defence dak tenük yoker aonung tepiyong amak, ta Israel Defense Force ajanga ashi.
Syria sepaitemi Israel nunger missile timba khazüka yok ta ashir. Saka iba rara asadangertemi ashiba agi, sorkar busema rarar tajemba agi 11 tepset.
Samungnü Quds Force-i Syria nungi Golan Heights tsütsüi rocket khaloktsüba ajanga amak, ta IDF-i ashir.
Iran ya Israel tsükchir lir, aser parnoki Syria Tir Bashar al-Assad busema sepai meyirijang aika yoka lir.
IDF-i Syria telung nung amakba aibenbo nangzüka mali. Saka Tentonü Quds Force dak amakba ya Twitter ajanga sangdong.
Mapang tatsüka lir parnokisa sangdongba agi, Israel fighter jet temi Damascus International Airport nung aliba raraba hadir ayuba tesem, Iran nunger itangiter aliba tesem aser Iran sepaitem training agiba camp nung kongshiogo.
“Iran-i tashiyim amshiba yariba Syrian sepai aser Iran anema onoki inyaker,” ta Israel Ato Kilonser Benjamin Netanyahu-i ashi.
“Onok yirutsütsü meranger ajak dak onoki amaktsü. Shirnokisa onok samatsütsü amokmerener, parnok khuret asütsü,” ta pai ashi.
UK nung amenoka aliba Syrian Observatory for Human Rights ajanga ashiba agi, Iran sepaitem indang hadir yua aliba tesem aser Iran-i yariba Lebanon telungpur telok, Hezbollah dak kongshi.
Saka Syria sorkar meyong Sana news agency ajanga ashiba agi, “Asen air defence ajanga tsükchirtem indang missile tem nokdanga nükjidong madongdang timba khazüka yok.”
Iran ama Syrian sorkar busemer Russia sepaitemi ashiba agi, parnoki missile aser guided bomb 30 dak tali khazüka yokogo.
Iba lendong ajanga Damascus International Airport tera raksa aser Syria sepai pezü taküm samatsü aser trok yiru, ta Russia sepaitemi ashi.
Iba osang züluba mapang tashinung Iran-ibo telangzüba kecha agüja mali.