Israel-i West Bank ali tashiyim agi agitsü sangdonger

Jerusalem, January 21 (Agencies): Israel-i Jordan arrtsülen densemba West Bank lushi tuluka tashiyim agi agitsü lemtetba osang ka tanü Brehostibar nü sangoktsüogo.

Par linüki tan sangoktsüba ama aliji tashiyim agi agira, par linük aser par linük pusemba West linüktem na tsüngda tesendaktep mejungi akümtsü akok.

“Ozü linüki West Bank ali tashiyim agi agitsü lemtetogo aser aliji Israel meyong kümdaktsütsü maparena tatembangleni aruogo,” ta Israel defence ministry-i tanü osang jangjashitsü.

Tan tashiyim agi agitsü mekazükba alimang ya Jericho yimti anasa, Jordan Valley nung acre 154 shi tulu aliba osang jangjaogo.

Iba alimang nung Israel-i nüburtem alitsü kitema taoba mapang tenteta lir aser kasa ali ya Palestine nungeri par lush ita züngokba alimang ka lir.

Israel-i tan tashiyim agi agitsü renemba ya par linüki 2014 küm April ita ali tashiyim agi agiba sülen tan alimang tulutiba agitsü maparen tenzüker lir.

United Nations (UN) Secretary General, Ban Ki-moon-ia tan Israel-i agiba telemtetba aitsüogo aser Palestine lenirtemia Israel anema ozüng alema ki o jen tentetba ken o UN nung benoktsü amokmerenogo.

“Tashiyim agi ali agia nisung alitsü ki tentetba maparen ya alima ozüng alema inyakba maparen ka lir. Ano, Israel-i tan ali tashiyim agi agitsü renemba ajanga par linüki taoba mapang agiba yimjung tezüngzüktepa raksatsü tenzüker lir,” ta Ban-i metetdaktsü.

“Israel-i Jordan Valley par yimli kübok aitdaktsütsü tatemtsü bener tashiyim agi ali rakzüktsü maparen tenzüker lir. Iba ama ozüng alema inyakba aser tensa mejungi kümdaktsütsü maparen nokdangtsü asoshi alima tashi abenba linük aser tentet ajunga ajungshir,” ta Palestine Liberartion Organization (PLO) nung tongti lenir katia kanga jashia metetdaktsüogo.

“Tan Israel-i tashiyim agi ali agitsü maparen inyakba ya par linüki taoba mapang linük anati aroki lungjemer mangatettep ken o bentettsü asoshi agiba tezüngzüktep anema aser ozüng alema inyaker lir aser kasaji ozü US sorkari aitsür,” ta US Deputy State Department otongdar, Mark Toner-ia metetdaktsüogo.

Ano külen, Europe ajunga jashidaktsütsüsa, Israel mitkartemi European Union (EU)-i senotsü teyari agüja Bedouin kin asoshi West Bank nung tentetba ki 6 tashi raksatsüba osanga jangjaogo.

Israel Ato Kilonser, Benjamin Netanyahu-ia Switzerland kübok Davos nung ayongba World Economic Forum nung o jembiba den külemi, US Secretary of State, John Kerry dena ajurutepba osang jangjaogo.

Ajisüaka, Israel-i tashiyim agi ali agitsü renemba onükji Netanyahu-i benok asü mebenok iba osangbo tang tashi mejangjateti lir.