Israel itangiter, Pollard US tepuokdak nungi chiokogo

Washington, November 20 (Agencies): US tepuokdak küm 30 tashi puoka ayuba sülen Israel nunger itangiter, Jonathan Pollard parole talenba nung tanü Hokolbar nü chiokba osang jangjaogo.

Tanü chioksang, arishi küm 60 tain Pollard ya US navy intelligence officer ka liasü saka pai US linük indang mim osangtem Israel den lemsatepba ken o nung aitsüba sülen pa nem taküm tepiyong tepuokdak puoka ayutsü temerenshi agüja liasü.

“Küm 30 shi timtema aliba sülen, Pollard-i par kibong den tanaben ajurutepa alitsü jenjang tajung nguogo,” ta shia, Pollard tepuokdak nungi chiokba atema pelaba olen ka Israel Ato Kilonser, Benjamin Netanyahu-ia tanü metetdaktsüogo.

Pollard chiokba jakdang pa tepuokdak nungi chioktsü asoshi Netanyhau-i US sorkar ajungshia liasü.

“Pollard alitsü ki ka New York yimti nung bushija aliba den külemi, pa atema mapa ngua lir,” ta Pollard’er okatsürtemia metetdaktsü saka Pollard den sentakba tanga osangbo parnoki memetetdaktsü.

Pollard tekaraba mapang nung Isreal-i anir aotsü asoshi US Congress yimsüsür ishika densema, Netanyahu-i takhangba onük benoka lir saka parole talenba kübok Pollard US nung tajemba agi küm 5 tashi alitsü latetja lir.

Isreal-i taoba mapang, 1990s nung Pollard par itangiter lir ta nangzükba den külemi, pa nem Israel sensoa agüja liasü.

Ano külen, “Israel atema mim osangtsüsang benden ta Pollard-i 1986 küm nangzükba sülen pa nem taküm tepiyong tepuokdak puoka ayutsü temerenshi agütsü. Ano, Pollard küm 30 tepuokdak puoka ayuba sülen pa parole talenba nung chioktsü asoshi lenmanga lapoka yutsü,” ta White House-ia tanü osang jangjashitsü.

Ajisüaka, Pollard indang parole talenba melenshija pa nem Israel-i aotsü temeten agütsütsü tebilembabo mali ta White House-isa metetdaktsüogo.