Israel mitkartemi Palestine kiralongrar ki raksatsür

Jerusalem, October 06 (Agencies): Israel mitkartemi par Jerusalem yimti nung lendong kanga sashia atalokdaktsüba Palestine nunger kiralongrar 2 aliba ki tanü Mongolbar nü raksatsüba osang jangjaogo.

Taoba Brehostibar nü nungi tenzüka Palestine nunger kiralongrartemi tongpang nung amshitsü prangpng aser kotari amshia Jerusalem yimti nung ishikba agi nisung 4 tashi tepseta lendong atalokdaktsüba sülen Israel mitkartemi tanü Arab East Jerusalem nung kiralongrar ana aliba ki anaji raksaja liasü.

Tan par Jerusalem yimti nung lendong kanga sashia ataloktsütsü tenzükba den sentakba rongdak senden ka Israel lenirtemi yasüng, Hombar aonung amenba sülen tawa par mitkartemi tepsetba Palestine nunger kiralongrar ki anaji raksatsüba den külemi, par linük anemba kiralongrar anema raratsü telemtetba agia liasü.

“Israel anema nokdakba kiralongrar songtemtsü asoshi ozü mitkar tashi amshitsü lemtetogo,” ta Israel Ato Kilonser, Benjamin Netanyahu-ia tanü metetdaktsü.

Israel mitkartemi tanü ali atudang amshiba bulldozer amshia raksatsüba ki anaji tawa Jerusalem synagogue nung sarasadema alir Israel senso 4 aser police ketdangser 1 tepseter aser bulldozer ka amshia Yihuda nunger tanelar lenir, rabbi ka tsüngseter nati renemba ki aliba osang jangjaogo.

Ajisüaka, “Israel lenisang, Netanyahu-i ozü linük ana tsüngda jembitsü melunga mali,” ta shia, Israel-i par mitkar tashi amshia West Bank nung par mulungka agi inyakba ajanga tan amala lendong ya mapang shia ataloker ta tongti Palestine ketdangser, Ashraf al-Ajami-ia tanü metetdaktsü.