Israel nung Yihuda nungertem pei ki azüngtetdaktsü tenzükogo

Ofra, February  28, 2017 : Israeli force temi West Bank, Ofra nung Yihuda nunger ki aika azüngtetdaktsütsü asoshi mita aoba mapang Israel arrtsülen anüker police kati pei lokti temeden asoshi nokdaker nisung ka anienba noksa nung angur.

Tel Aviv, February 28 (Agencies) : High court-i tetuyuba agütsüba sülen Mongulbarnü nungi Israel police-i linük West Bank tesem tiyong nung amenoka aliba Yihuda nunger parnok kibong 9 tashi pei ki azüngteta yutsür odaktsüba maparen tenzükogo.
Okadaki West Bank, Ofra nung aliba Yihuda nunger kibong toku indang ki bensajang ta tetuyuba agütsü kechiba süra parnoki parnok aliba kitemji Palestine nunger nija li nung asübatem lir, ta osangbenertemi ashi.
“Okadaki tuyuba tashi anga iba tesem nung aliba kibong tokui parnok aliba kitem azüngteta yutsür aotsü tenzükogo,” ta Israel police nung otongdar Luba Samri-i metetdaktsü.
Iba tesem nung aliba Yihuda nungertemi ki bensatsüba mapa anendakjang ta mepishia züluba shidi ka High Court-i Hombarnü magizüki toktsü.
1967 küm nungi West Bank tesem tiyong nung aliba ki kar bensatsütsü asoshi okadaki tetuyuba agütsü. Iba tesem nung nisung 3,500 shi telidak lir. Item ki bensaba sülen alitemji shitakba ali kiburtem nem meyipa agütsütsü anungji iba ozüng ya March 05, 2017 tashi mapa küma inyaktsü lateta yutsür, ta okadakisa ashi.
Iba tesem nung ki aika bentoktsütsü mapang lateta yutsüba ozüng anema nisung meyirjang aika adenshia longka aitogo aser ano tang telok jagi longkak tasen ka tenzüka Israel Ato Kilonser Benjamin Netanyahu-i aniba sorkar den oa ajurutepa okadaki latettsür aliba ozüngji mapa tekümdaktsü ta temepishiba ka agütsütsü, ta osangbenertemisa ashi.
Tangar lia aliba tesem nung arua amenoka alibaji ozüng alema lir, ta International temzüng nung lir. Ajisüaka Israel temzüng kübokbo item amala karbo ozüngi melar saka ano karbo ozüngi memelar.