Israel nungeri Mizoram sorkar nem teyari agütsü

Aizawl, Metsüremi 8 (Agencies): Mizoram chief minister Lal Thanhawla aser Israel ambassador Daniel Carmon na sentepa south Mizoram, Lunglei district kübok Haulawng aser Mualthuam N yimtsüng tsüngda Northeast nung mezüngbuba Indo-Israel Centre of Excellence for Fruits lapoktsüogo.
Sen lakh 900 indoka amenokba iba project ya Mission for Integrated Development of Horticulture (MIDH) kübok Israel sorkar den sentepa inyakogo.
Lal Thanhawla-i state nung Indo-Israeli centre of agriculture amenoktsü asoshi DoNER minister Jitendra Singh aser state horticulture minister P.C. Lalthanliana nati achaayanga inyakba atema tena tenüng asang.
Paisa iba centre ajanga Mizoram nunger dang masü saka Northeast ajunga ajangzüktsü, ta ashi. Israel nungeri sen teyari agüja amenokba iba centre nükjidong ataloktsü asoshi department ketdangsertem aser iba tesem nung aliba nüburtem dang meranga inyaktsü asoshi ajungshi.
“Onoki onok aliba tesem ochishia aser temulungtetba tulu nung yanglushitsü,” ta ashiba den paisa iba centre ya state terenlok atema alizüng ka asütsü, ta shisem.
Carmon-ia parnok longjemer inyaktetba atema pelaba lemsatep aser iba centre ya Mizoram nunger nem bendanga agütsü.
Paisa India sorkar den technology tsütsü sendakteper inyakba ya senti lir, ta ashiba den aluyimba aser water management sectors nunga külemi senteper inyaktsü, ta ashi.
Iba amala centre ya Northeast nung tang mezüngbuba lir aser centre amenoktsüba atema Lunglei district kübok yimtsüng ana yagi ali agüja liasü.