Israel-Palestine tensa tamajungba akümer

 

Jerusalem, October 09 (Agencies): Palestine nungertemi tawa Jerusalem yimti nung lendong atalokdaktsüba kepzüktsü nükjidong nung Yihuda nunger kati Israel anülulentip tsütsülen, Dimona yimti nung Arab nunger nisung 4 tashi kotari agi tanü Hokolbar nü yirutsüba osang jangjaogo.

Tawa Jerusalem aser Israel-i tashiyim agi agia aliba West Bank na nung Israel nunger 4 tashi prangpong aser kotari amshia tepsetba aser nisung 10 dak tema yirutsüba ajanga Israel aser Palestine na tsüngda tensa kanga mejungi akümba osang bushiteta lir.

Ano, Palestine senso 3 tashi tepsetba den külemi, Israel mitkartem den raradang Palestine senso aika East Jerusalem aser West Bank na nung yiruba osanga jangjaogo.

Yihuda nungeri Temple Mount ta züngshiba aser Muslim nisungtemi Nobel Sanctuary ta züngshiba temeshi tesem nung inyaksangi melenshitsü asoshi Israel sorkari meranger ta temulung malemtsü tenzüka Palestine nüburtemi Israel anemtsü tenzüka lir.

“Al-Aqsa mosque tentetba tesemi aitsü asoshi Yihuda nunger melar saka Palestine nungerbo nokdanger ta jembir saka ozü sorkari yamaji inyaka mali,” ta Israel Ato Kilonser, Benjamin Netanyahu-ia metetdaktsüogo.

Ajisüaka, pai yamaji sangoktsüba ajanga tang tensa mejungi akümbaren tajungba küma memelenshitettsüteti lir.

Ano, Netanyahu den sema, Palestine Tir, Mahmoud Abbas-ia kechisarena ajunga nung aremzüka inyakteptsü asoshi nüburtem ajungshitsü tenzükba den külemi, Israel aser Palestine mitkar aser police ketdangsertemi amalitepa tensa azüoktsü maparen inyaktsü tenzüka lir saka yamaji inyak aka, par tensa tang tamajungba akümba osang bushitetogo.

Ano külen, “Abbas-i aniba Fatah yimtenren teloki ajungmesor külen Islamist telok, Hamas-i hopta ishika tejaklen nungi East Jerusalem nung lendong balala atalokdakja tensa mejungi kümdaktsür.” ta Netanyahu-i yashi aitsüba olen ka metetdakja liasü.