Israel PM Netanyahu-i PM Modi pela agizük

Tel Aviv, July 4 (Agencies): Mongulbarnü Ben-Gurion Airport, Tel Aviv nung Israel Prime Minister, Benjamin Netanyahu-i Prime Minister, Narendra Modi pelashishia agizük.
Tayimtsü anendak lennir ana mapang tatsüka azütep aser iba sülen Netanyahu-i Modi den sentepa aliba ketdangsertem tejak shiyutepa liasü.
Netanyahu aser Modi na guard of honour adena sabangi atu aser idakji Netanyahu-i Modi dang Hindi oshi agi, “kü medemer, na pelashishia agizüker” ta ashi.
“Nai semdangba mapang, nü Make in India maparen aser kü Make with Israel tangatetba ajuruteper. Asen linüktem tsüngda technology atema onoki metsü proker ama, $40 million innovation fund tenzüker” ta Israel Prime Minister-isa ashi.
“Onoki tesüiba küm 70 tashi India Prime Minister kati ozü linük semdangtsü atayonga aruogo” ta paisa shisem.
Modi-ia o jembidang Hebrew oshi nung “Shalom, ni yangi aruba atema kanga pelar” ta ashi.
“India nungi Prime Minister kati Israel mezüng semdangbaji kü atema tetushi ka lir” ta paisa shisem.
“Ni Israel semdangba ajanga linük ana tsüngda tesentaktep tajungba akümtsü. Nenoki ni pelashishia agizükba atema kanga pelar” ta Modi-isa shisem.
Küm noklang aika tejakdang nungi asen lokti ana tsüngda tesentaktep liasü aser iba nung ajemdaker asenoki küm 25 tejakdang diplomatic relations yangluba akangshitsüla, ta paisa ayongzük.
Tayimtsü anendak nungi Prime Minister Modi-i Netanyahu aser Agriculture Minister Uri Ariel na den Moshav Mishmar Hashiva nung aliba Danziger flower farm semdang.
Modi-isa Yad Vashem Memorial Museum semdang aser idakji holocaust nung tepsetertem nem tetushi agütsü.
Holocaust ya Adolf Hitler’er Nazi Germany nung Yihuda nunger million 6 shi tepsetba lir. Tasürtem rongnung tanur million 1.5 shi liasü. 1933 nungi Yihuda nunger tepsettsü tenzük saka World War II mapang küm pezü tsüngda Yihuda nunger lokti tepsetba inyakyim atalok.