Israel police aser Palestine nunger Mosque nung rartep

Jerusalem, September 28, 2015: Israel police temi Muslim nungeri “Noble Sanctuary” ta ajaba tesemi Yihuda nunger mena aiba noksa nung angur. Iba tesem dang Yihuda nungeri ‘Temple Mount’ ta ajar.

 Jerusalem, September 28 (Agencies): Palestine nunger aser Israel police na Jerusalem Al-Aqsa mosque tesem nung raratep tasen ka ataloka liasü aser ibaji ajanga Yihuda nunger ajak adenshia Sukkot benjung sodi amungba mapang lendong adoktsü südi ta tsüputeper.

Taoba mapang raratep atalokba sülen Yihuda nungeri Temple Mount, ta ajaba Mosque tesem nung police duty dokja lir. Islam tamangba yimsü nung temeshitiba tarensen nung tasembuba tesem, Al-Aqsa ya Judah nunger asoshi kanga dang temeshi lir. Yihuda nunger iba tesem yagi aittsü temelaba agüja lir ajisüaka mangatettep madoktsü meji parnok iba mosque nung sarasadembo magidaktsür.

Deobar nü raratep tasen atalokba nung mosque kümzüka ayutsü atema Palestine nunger lungkak aitertem dena liasü. Parnoki lung bendena yur iba tesem nung mejanga liasü.

Palestine nunger lanurtemi tejak sü agi meyipanger police dak lung aser tapoktsü tilala agi ona liasü, ta police-i ashi.

Deobar anepdang tera menorang police tem senshiba sülen iba raratep süngjema aküm, ta AFP osangbener kati ashi.

Yihuda nunger iba mosque-i aittsü asoshi Deobar nü temelaba agütsüogo aser Muslim amanger küm tasazük kar ang aittsü ta ozüng aliba Eid al-Adha benjung tenüng nung ajak aitettsüsa lapoktsü saka arishi küm 50 kübok tembo Sukkot tenzükba anogo nungi maitdaktsütsü ano lemtetshiogo.

Yihuda nunger aika iba tesemi aruba ajanga, iba tesem nung lateta aliba ozüng raksatsü amai Muslim mungeri bilemer.

Taoba hopta nunga Yihuda nunger iba tesemi aruba ajanga raratep kanga bulua liasü aser tang Sukkot benjung mapanga iba ama kasa mangatettep ano ataloktsü tsübuteper.

Yihuda nunger Egypt nunger talenba nungi nüjisa ngur külen Sinai ajanga nangzükba lima bushia aoba temaitsü parnoki Sukkot (Fest of Tabernacles) bejung ya amunger.

Ashiba agi, Al-Aqsa tesem nung aliba Yihuda nunger tenla ki mezüng aser tanabuba naprongla Babylon aser Rome nungeri raksatsü.

Anungji tang Yihuda nunger temi tenla ki tasembuba asütsü asoshi inyakyim tenzüktsü merangdar.