Israel Tir Reuven Rivlin-i anogo 8 atema India semdanger

Mumbai, November 14 (Agencies): Hombarnep Israel Tir, Reuven Rivlin Mumbai tonga aruogo, pai India anogo 8 nü semdangba mapang linük ana tsüngda tesentaktep tajungba akumtsü atema jembitsü; Tanep Rivlin Mumbai airport tonga aru, aser tanüsa Delhi-i ogo.
Pai Ato kilonser, Narendra Modi, External Affairs Minister Sushma Swaraj na ajurua senden amentsü aser linük ana indang joint projects tesem aika semdangtsü.
Ano Chandigarh nung The Israel lenir Rivlin aser India Tir, Pranab Mukherjee nati agro-tech conference tenzüktsütsü.
Israel lenirisa kiralongrartemi 2008 küm Mumbai amakba tesem semdangtsü aser Mahatma Gandhi memorial den World War I mapang India nung asür sepaitem indang memorial nung akhüm agüja naro toktsütsü.
November 26, 2008 nü kiralongrartemi Mumbai Chabad House amakdang Yihuda (Israel) nungera nisung trok asü.
Rivlin-isa Indian tongti ketdangsertem aser India nung aliba Yihuda nunger lenirtem ajurua senden amentsü sentong lir.
Tanep pa Israel nungi apusotsü lia pai, “Tongtibang nüngdak atema India semdangtsü asoshi ni tang apusor. India ya Israel atema tongtibang partner aser tembar tajung ka lir. Iba linük den asenok (Israel) onüktem aika kasa lir,” ta metetdaktsü.
Israel Tirisa, “Israel aser India naprong ya tasen apiteta inyakba aser ajungmesoba linük lir. Linük ana akhi sobaliba lir, saka rongsenkettsüng nung temaba jenjang nguogo aser tang agi küm 25 buba linük tesentaktep lir,” ta ashi.
Paisa, “Tang semdangba ya, asen (linük ana) nüburtem tsüngda tesentaktep tajung aliba aser tembar tajung asüba temaitsü lir, aser iba ya tesentaktep taliba aintsü atema süngjang rema toktsür asütsü ta imlar,” ta metetdaktsü.
Rivlin densa pa meina Israel nung shisaliok rejutem nungi Tirtem aser tongti züngsemtem aru, aser parnoki India nung shisaliok rejutem den tezüngzüktep kar agitsü imlar.