Israel Tiri Agra water treatment plant semdang

Agra, November 16 (Agencies): Bodhbarnü Israel Tir, Reuven Rivlin-i Sikandra nung 144MLD water treatment plant semdanga liasü; iba plant ajanga Taj Mahal aliba yimti, Agra nung nisung million 2 nem tzü tajemtsü agütsür.
Iba treatment plant nung Aqwise nungi Israel nunger indang technology amshir.
Israel Tir, Rivlin-i iba tesem semdangba pelaa agizüka Israeli Water Sector Steering Committee mendenbuba aser Aqwise CEO, Elad Frenkel-i, “Agra nung aliba treatment facility-i na aruba atema pelar. Iba tesem ya ajanga Israel aser India na tesentaktep tajung aliba sayur,” ta ashi.
Frankel-isa, Israel nunger technology temji India aser alimai aginer, kechiyong item technology ji tasen purapiteta yanglubatem lir aser kanga tajung lir, talisa cleantech sector nung kanga junger, ta metetdaktsü.
Israel Tiri iba water treatment plant nung aliba marok ka nungi tzü ajemba ajanga aika süngmangtepa liasü.
Iba water plant nung ketdangser kati, “Iba plant nung water treatment facility ji Triveni Engineering Industries Ltd ajanga inyaker aser iba indang biological technology ji Israel nunger company Aqwise-i AGAR (MBBR) moving bed bio-reactor technology nung ajemdaker agütsür,” ta metetdaktsü.
“Iba ya Yamuna ayong nungi tzü treat asüba water facility ka lir aser iba ya ajanga yimti nung alir nisung million ana nem tajemtsü tzü agütsür,” ta paisa ashi.
Iba facility ya 2014 küm nung tenzüka liasü aser iba ya India nung tulutiba aser alima nung water treatment plant tulutem rongnung ka lir.
Israel nunger indang company, Aqwise ya alima linük 40 nung tesem 400 tashi nung amenoka lir.
Osangbenertem den jembidang Israel Tir, Rivlin-i, taküm alitsü atema tongtibang anaji tzü aser ali lir, ta ashi.
“Tsüngremi India moajang! Ki shia nung tajemtsü tzü angutsü ta onoki amanger. Iba project ya asen linük ana tesentaktep tajung aliba temaitsü lir,” ta paisa ashi.
Tanü Rivlin-i iba campus nung “Kadamb” süngdong ka tema toktsüogo.