Israel’er East Jerusalem nung nisung alitsü ki asütsü mapatong aitsür: US

Jerusalem, November 03 (Agencies): Israel sorkari tashishitsü aketba aser mangatettep ken o adokdak, East Jerusalem nung nisung alitsü ki 181 tashi asütsü temeten agütsüba osang angazükba sülen iba ken o nung ajemdaker, US sorkari Israel aitsüogo.
“Israel sorkari mangatettep ken o adokba tesem nung nisung alitsü ki asütsü mapatong tenzükba maparen kanga sashia aitsür. Israel-i yamaji inyakba ajanga par linüki Palestine den yimjung mapatong takok ngua inyaktsü temulungtetba maliba kuli sayur,” ta US State Department otongdar, John Kirby-i sangoktsü.
“Tan East Jerusalem kübok Gilo nung ki asütsü temeten agütsübaji temeten agüja alirtem nem kimong lemzüktsür dang lir kechiyong ki asütsü temetenji taoba mapang, 2012 küm mezüng agüja liasü,” ta Israel sorkar otongdar, Brachie Sprung-ia par sorkar metentsüba olen ka metetdaktsüogo.
1967 tongpang raraba sülen Israel-i West Bank tashiyim agi agiba den maneni Jerusalem ajunga par yimsüsüba kübok aitdakja, par nüburtem nem tashishitsü aketba tesem nung ki asütsü temeten agütsütsü tenzük.
Ajisüaka, East Jerusalem-ji par tarutsü yimtiba ta Palestine linüki züngshir aser par linük pusema, alima-ia Israel-i West Bank nung inyakba nisung alitsü ki o jen asütsü mapatong aitsütsü tenzüka lir.