Isreal-Palestine yimjung atema maneni inyaktsü: Kerry

Washington, April 19 (Agencies): Israel aser Palestine na tsüngda yimji yimjung lidaktsütsü asoshi maneni bendanga agüja inyaktsü tenangzükba olen ka US Secretary of State, John Kerry-i tanü, Mongolbar nü metetdaktsüogo.

“State ana tenteta lenjiotepa alitsü asoshi Israel o Palestine nati tezüngzüktep agiba ajanga dang par linük anati tangatettep kati aruteta yimji yimjung lidaktsütettsü,” ta pai tanü metetdaktsü.

“Israel o Palestine nati kati ka aija dangbo malitsüla. Ajisüaka, tangatetba melenshia kati ka angatettsü merangtsüla,” ta pai ashi.

2013 küm tetenzüklen nungi tenzüka US Secretary of State menden abensang, Kerry-i Israel o Palestine na tsüngda yimji yimjung lidaktsütsü alizüng tongtipangsüa ayu aser pai ayonger külen linük anati ita 9 tashi yimjung senden mena tanaben sentaktepshitsü merang saka par linük ana tsüngda tangatettep kati maruteti iba sentongji 2014 küm April ita tembang.

Yamaji ataloker ita ishika sülen Israel o Palestine na tsüngda anogo 50 tashi Gaza nung tongpang kanga sashia raraba ajanga par linük ana tsüngda tensa tamajungba aküm aser tanü tashi par linük anati tangattep kati maruteti lir.

Ano, Palestine-i par lushi ta züngshiba tesem nung Israel-i nisung alitsü ki asüba ajanga par linük ana tsüngda mangatettepbarenji tamajungba kümdaktsüba osang bushiteta lir.

“Palestine lenirtemi par nüburtemi Israel nüburtem amakba maparen maitsüba ajanga par linük ana tsüngda yimjung alitsü maparen nem tetsükdakba bener arutsür,” ta US Tatong Tir, Joe Biden-ia metetdaktsüogo.

“Ni Israel Ato Kilonser, Benjamin Netanyahu aser Palestine Tir, Mahmoud Abbas naprongla den taoba March ita tsüngdong ajuruogo saka tena den ajurutepba sülen par linük anati tarutsü anogotem nung lenji oa tanaben sentaktepshitsü mangdang ayuba mangu,” ta pai shisem.